Қостанай полицейлері көлік ұрлаушыны жедел түрде ұстады
Меңдіқара ауданының Татьянов ауылында жергілікті серіктестіктердің бірінің аумағынан "JAC T6" маркалы автокөлік ұрланған. Полицейлер бірден бекеттер қойып, "Автоураган" жүйесі арқылы іздеуді бастаған. Меңдіқара және Қостанай аудандарының полицейлері бірлесіп, өтініш келіп түскеннен кейін бір сағаттың ішінде автокөліктің орналасқан жерін анықтады.
– Өтініш келіп түскеннен кейін жеке құрам ұрланған көлікті іздеуге бағытталды. Жедел-іздестіру іс-шаралары барысында бұрын сотталмаған 23 жастағы күдікті ұсталды. Ол көлік тұрған нысанның ашық есіктерін көріп, тұтану құлпындағы кілттерді пайдаланған. Автокөлік Қостанай ауданының аумағында техникалық жарамды күйде тоқтатылды, – деді Меңдіқара ауданы бастышысының жедел жұмыс жөніндегі орынбасары Ермұхамбет Жылыспаев.
Қазіргі уақытта "Автокөлікті немесе өзге де көлік құралын ұрлау" 200-бабы 1-бөлімі бойынша сотқа дейінгі тергеу басталды.
