Тұмаумен ауырғандардың дені балалар
Облыс бойынша соңғы аптада коронавируспен ауырып жатқан 45, алдыңғы аптада 29 адам тіркелген. Кестеге сай біз «жасыл» аймақтамыз. Облыстық өңірлік коммуникациялар қызметінің алаңында облыстық денсаулық сақтау басқармасы басшысының орынбасары Арман Баймағамбетов «Қостанай облысындағы эпидемиологиялық жағдай туралы» есеп берді.
Қазір тұрғындардың арасында тұмау көп. Әсіресе балалар көп ауырып жатыр. «Тұмау кенеттен басталады, дененің қызуы тез көтеріледі. Ағза әлсіреп, науқастың денесі қалтырап, әлсіздік, бұлшықет пен бас ауыруы, бүкіл дененің сырқырауы, кеуденің артқы жағы ауырып, құрғақ жөтел пайда болады. Тұмау және ЖРВИ белгілері пайда болған кезде медициналық көмекке жүгініңіз, өйткені тұмаудың өзі емес, тұмау мен жедел респираторлық инфекциялардың асқынуы қауіпті» дейді Арман Баймағамбетов.
Халықтың неғұрлым осал топтарын иммундау үшін 2022 жылда "ГРИППОЛ+" вакцинасының 80 мың дозасы сатып алынған. 80 мың адам егілген, оның ішінде 7 455 бала және 68 205 ересек адам.
«Коронивурспен ауырып жатқан адамдар бұрынғыдай емес, ауру жеңіл түрде өтуде. Бірақ науқастың жұқтыру қаупі жоғары. Сондықтан ауырғандар емханаларда ем алып, көпшілік жерде бақылап жүргені дұрыс» дейді облыстық санитариялық-эпидемиологиялық бақылау департаменті басшысының орынбасары Гүлім Досымова.
АйтолқынАЙҚАДАМОВА.
