Жерлестеріміз Азия чемпионы
Тайланд елінде кикбоксингтен өткен Азия чемпионатынан жерлестеріміз олжалы оралды. 91 келі салмақ дәрежесінде бақ сынаған Темірлан Қабиев пен 86 келіде сынға түскен Мәди Тоқтаров байрақты бәсекеде топ жарды. Темірлан финалда ирактық қарсыласынан айла асырса, Мәди Тоқтаров кувейттік бәсекелесінен басым түсіп, Азия чемпионы атанды. Сөйтіп, турнирдің техникалық тұрғыдан үздік спортшысы атанды. Екеуі де облыстық полиция департаментінің қызметкерлері.
Құрлықтың жиырма екі елінен төрт жүзге жуық спортшы өнер көрсеткен додада қаракөз қыздарымыз да жүлдесіз қалған жоқ. Қостанайлық Ариза Сманова 48 келіде күш сынасып, финалдық бәсекеде вьетнамдық қарсыласына ғана есе жіберіп, Азия чемпионатының күміс жүлдесін олжалады. Тағы бір жерлесіміз Алина Төлегенова 52 келі салмақ дәрежесінде қола жүлде иеленді.
Айбек Ғалымұлы.
Дереккөз:Arna_news
