Қардан кейінгі қарбалас
Қостанайда қар 16 сағат бойы толассыз жауып, қала тұрғындарының жүріс-тұрысын едәуір қиындатты. Қазір коммуналдық қызметшілер, мердігер ұйым өкілдері күндіз-түні дамылсыз жұмыс істеп жатыр.
«Қазгидромет» орталығының мәліметінше, 24-25 қарашада түскен қардың қалыңдығы 18 сантиметрге жеткен. Бұл кезеңдегі айлық меженің өзі әрі кеткенде 24 см болуы тиіс. Қазір қала ішін қардан тазалау жұмыстары үзіліссіз жүруде. Қала тұрғындары да таң-азаннан аулаларын қалың қардан аршумен әлектеніп жүр.
«Бүгін түнде 87 техника жұмыс істеді. Таңнан бастап олардың қатары 127-ге көбейді. ТКШ бөлімінің, мердігер ұйымдардың қызметкерлері – ұзын саны 300-дей адам жұмылдырылған. Барлық жағдай жіті бақылауда, кезекшілік кестесі түзілді. Барлық шағын аудандағы ахуалды қадағалап отырмыз. Осылай шамамен 20 күндей дамылсыз жұмыс істейміз», – дейді қалалық ТКШ бөлімінің басшысы Данияр Сәбитов.
Бөлім басшысының айтуынша, қардан тазалау жұмыстары 3 деңгей бойынша жүргізіледі. Әуелгі кезекте магистральді жолдар, яғни жолаушылар көлігі жүретін және әлеуметтік нысандарға кіретін жолдар аршылады. Одан кейін жұмысшылар жеке секторларға көшеді. 1-деңгейге жатқызылған аумақтардағы қарды тысқа шығарудың өзіне 2-3 күн жұмсалмақ.
Толығырақ газеттің алдағы нөмірінен оқи аласыздар.
Суреттерді түсірген Бағдат Ахметбеков
