Сабақтастық салтанаты

18 мамыр – Халықаралық музей күні. Осы мерекеге орай Ы.Алтынсариннің Қостанай облыстық мемориалдық музейінде «Музей түні» акциясы өтті.

Ауқымды іс-шара шымылдығын «Айсұлтан» өнер орталығының шәкірттері «Балбырауын» күйімен түрді.

Қостанай облысы әкімдігінің мәдениет басқармасы басшысының орынбасары Сәуле Әзімжанова мен Ыбырай ізін жалғастырушы ғалым, философия ғылымдарының кандидаты Қалқаман Жақып сөз алып, Халықаралық музей күнімен құттықтады.

«Сіздерді Халықаралық музей күнімен құттықтаймын. Ыбырай Алтынсарин музейінде өтіп жатқан «Музей түні» акциясының мән-маңызы зор. Жас ұрпаққа тағылымы мол өнегелі дүниелер көрсетіліп жатыр. Өткен жылы Ыбырай бабамыздың 180 жылдығы кең көлемде атап өтілді. Биыл Ахмет Байтұрсынұлының 150 жылдық мерейтойы келе жатыр. Ұлы тұлғаларымыз дәріптеле берсін. Музейдің бір қызметі – тұлғалар мұрасын көпшілікке таныту. Сол жолда еңбектеріңізге табыс тілеймін», – деді мәдениет басқармасы басшысының орынбасары Сәуле Әзімжанова.

«Тағылымды іс-шараларды үнемі өткізіп, жас ұрпақ санасына құйып отыру керек. Екі жыл үзілістен кейін музеймен қайта қауышып жатқан көрермендердің арасында жастардың болуы көңіл қуантады. Музейді көне заттар ғана жинайтын орын деген сыңаржақ пікірден арылып, құнды жәдігерлер мекені ретінде қарауымыз керек. Өйткені мұндағы әрбір экспонаттың артында тұтас бір ғұмыр жатыр», – дейді А.Байтұрсынұлы атындағы ҚӨУ профессоры Қалқаман Жақып. 

Салтанатты жиыннан соң қонақтар ішке еніп, классикалық музыка әуенінде «Суреттер галереясын» тамашалады. Этноауыл бөлімінде Ыбырай заманына сапарлағандай ерекше әсер алды. Ұлы ұстаз кейпіндегі актер Нұрлыбек Кенжеахметов монолог оқып, балаларға киіз үйде сабақ өткізді. Онда балдырғандар өткен ғасырдағы сия сауыттарды қолданып жазып көрді.

Киіз үйдің бір шетінде ауыл тіршілігі бедерленіп, қазанға бауырсақ пісіріліп жатты. Қонақтар астан дәм татты. Екінші жағында асық ату, садақ ату, арқан тартыс сынды ұлттық ойындар ойнатылды.

Қала тұрғыны Биғанша әжеміз жастарға күбіде көженің дайындалу әдісін көрсетіп, келушілерге сусыннан дәм татырды.

«Енем ақтық демі үзілер алдында осы күбіні аманат етіп тапсырып еді. Содан бері бұл ыдыс қысы-жазы бір босаған емес. Тіршіліктің қамымен қалаға қоныс аударсақ та, кара көжемді дайындап, келген қонақтарыма беріп тұрам», – дейді Биғанша Қарақызы.

Музей ішінде қаламыздағы құрылыс колледжінің студенттері мен №28 мектеп-гимназияның оқушыларының қолынан шыққан туындылар көпшілікті бейжай қалдырмады. Одан кейін қаламыздағы Қостанай тұрмыстық қызмет көрсету колледжінің студенттері «Халықтар достығы» топтамасымен сән үлгісін ұсынды.

Ұлт санасының жаңа деңгейге көтерілуіне Ыбырайдың ізбасары, Алтынсарин ашқан мектептің түлегі Ахаң да ықпал етті. №28 мектеп ұстаздары мен шәкірттері қонақтар назарына «Ахмет және Ыбырай» театрландырылған көрініс қойды.

Қаламыздағы №9 Ғ.Қайырбеков пен №20 М.Хакімжанова атындағы білім ошақтарының оқушылары «Дала қоңырауы» поэмасы мен «Мәншүк» поэмасынан көрініс ұсынды. Қостанай қаласының №22 орта мектептің оқушылары арасында «Жеті қазына» интеллектуалдық ойын ойнатылды. Қолөнер шебері Мұхаметқали Рахалиевтің шеберлік сағаты өтті.

«Қазақ брэнд» атауын жаңғыртып жүрген аспаздар ірімшік, құрт-қаймағын, жент пен тарысын, жарма мен талқанын жәрмеңкеде саудалады.

«Іс-шарамызға еңбектеген баладан еңкейген қарияға дейін келді. Бұл ұрпақтар сабақтастығын сақтау үшін керек іс-шара. Екі жыл үзілістен кейін тамаша бастама қайта жалғасын тапқанына қуаныштымыз», – дейді музей директорының ғылыми жұмыстар жөніндегі орынбасары Салтанат Өтелбаева.

Мерекелік акция «Жыр жалауы – Ыбырай» атты поэзия кешімен қорытыланды.

Сералы МЫРЗАБАЙ,

Ы.Алтынсариннің Қостанай облыстық

мемориалдық музейінің

ғылыми-ағартуды қамтамасыз ету

бөлімінің сектор меңгерушісі.