Бағасы арзан, шарты жеңіл

Қазақстанда жеңілдетілген автонесие беріле бастады. Айлық табысы бар кез келген азамат бағасы 10 миллион теңгеден аспайтын көлікті 4% жылдық үстемемен, алғашқы жарнасыз-ақ сатып ала алады. Бірақ несие жеті жылға ғана есептеледі.

Елде автобус паркін жаңарту әрі отандық өндірісте құрастырылатын көлікті жеңілдікпен сату үшін «Жасыл Даму» АҚ (бұрынғы «ӨКМ Операторы») есебінен бағдарлама әзірленген еді.

Автонесие алушыға қойылатын алғашқы талаптардың бірі – жасы 21-ден асуы тиіс. Сонымен қатар, несие тарихы, айлық кірісі де міндетті түрде қаралады.

Жеңілдетілген кредитке келетін көліктер: Chevrolet, Škoda, Hyundai, KIA, JAC, Renault және Lada маркалары.

Бұл жаңалықты көпшілік асыға күткенге ұқсайды. Автосалондарда көлік таңдап, құжат әзірлеп, менеджерлерден ақыл-кеңес сұрап жүрген жандардың қарасы қалың. Ұзын-сонар кезекте бала-шағасымен тұрғандар да бар. Қостанай қаласының тұрғыны Айбек Ахметжанов көлік таңдауға отбасымен келген. Көп балалы отағасы JAC көлігінен үмітті.

«Қабырғаммен кеңесіп, осы «тұлпарды» таңдап тұрмын. Бағасы 8,5 млн теңгенің шамасында. Құдай берген жеті перзентіміз бар. Өзім мешітте имам болып жұмыс істеймін. Жұбайым бала күтімімен үйде отыр. Бірақ табысымыз жеткілікті. Банк келісім береді деп сенемін», – дейді Айбек. Жаңа көліктерге мініп көрген балалары да ата-анасының таңдауына дән риза.  

Қостанайлықтардың көбі Chevrolet көлігін таңдап жатқанын байқадық. Себебі – басқалардан арзанырақ. Бағасы 5 млн 990 мың теңгеден басталады.

«Әйеліме осы Chevrolet Cobalt-тен артығы жоқ деп тұрмын. Үнемді әрі жүргізуге ыңғайлы», – дейді қала тұрғыны Қайролла Төлеубеков.

Аталған көлікті Жанат Мінайдар да таңдапты. Ол да әуелі бағасына қарағанын жасырмайды.

«Досым екеуміз келдік. Ол механикалы беріліс қорабы барын, ал мен автоматты түрін қаладым. Банктен көлік алуға болады деген жауап алдым. Ай сайынғы төлемі 87 мың теңгеден шығып тұр. Алғашқы жарнасыз. Бұйырса, жеті жылда төлеп бітіреміз», – дейді Қостанай ауданының тұрғыны Жанат Мінайдар.

Жұрт арасында «көлік жетпей жатыр» деген қаңқу сөз тарап кетті. Бұған қатысты Қазақстан автобизнес қауымдастығының вице-президенті Анар Мақашева мәлімдеме жасады.

«Автосалондарда көліктер бар. Өткен жылы біздің екі өндіруші – Hyundai Trans Kazakhstan және «СарыарқаАвтоПром» шамамен 90 мың көлік шығарды. Жалпы, жеңілдетілген автонесиелендіру аясында көлік жеткілікті болады», – деді Анар Мақашева.

Маман биылғы болжам бойынша автомобиль өндірісі 20% өсуі тиіс екенін де айтып өтті.

Суреттерді түсірген Бағдат АХМЕТБЕКОВ.