Көшет егу – көшелі іс

Биыл облыстық «Қостанай таңы» газетіне 100 жыл. Қарт басылымның ғасырлық мерейтойы аясында редакция көптеген ізгі іске ұйытқы болмақ. Солардың бірі – көшет егу. Ұжым Қостанай қаласын көгертуге үлес қосты.

«Қостанай таңы» газетінің 100 жылдығын мерекелеу жоспары аясында облыс орталығында жүз түп ағаш отырғызу көзделген. Бүгін редакция ұжымы бір күнге қаламдарын күрекке алмастырды. Қаладағы 5 сәуір көшесінде орналасқан аллеяға көшет екті. Газеттің бас редакторы Жанұзақ Аязбеков мұның көптен бері ойда жүрген жоспар екенін айтты.

«Бұл – бұрынан келе жатқан дәстүр. Абыз газетіміздің тарихында қаланы көркейту ісіне талай ұрпақ үлес қосқан екен. Біз де осы үрдісті жалғастыруды мақсат еттік. Ұжыммен келісе отырып, қаланы көркейтуге азғантай үлесімізді қоссақ. экологиялық жағдайына септігіміз тисе деген ниет таныттық. Көптен бері көкейде жүрген жоспар еді. Оны іске асыру газетіміздің ғасырлық тойына тұспа-тұс келіп отыр. Көшет отырғызудың басы осы болғанымен, күзде ары қарай жалғасады», – дейді бас редактор.

Ұжым басшысы бұл іс-шара өзгелерге де өнеге болып, сүйікті қаламызды көркейтуге барлығы бір кісідей атсалысса деген тілегін айтты.

«Қазір жерді аялау, оны қорғау өзекті мәселеге айналып отыр. Біз, шыны керек, өз үйіміздің маңайынан арғыны көзіміз көрмейтін болды. Қаламыз сыртынан әдемі көрінгенімен, ішін аралап жүрсеңіз, тозған жерлер, қараусыз қалған гүлзарлар, қоқыс жиналған орындар көзге шалынады. Қолымыздан келетін іске кержалқаулықпен, керенаулықпен қараймыз. Өзіміз мекен ететін ортақ үйімізді көктетіп, көркейтуді әдетке айналдырсақ, қандай тамаша болар еді», – деген пікір айтты Ж.Аязбеков.

Редакция ұжымы гүлзарға пирамидалы терек шыбықтарын отырғызды. Бұл ағаштың бір ерекшелігі – кәдімгі теректер секілді ұлпа бөлмейді. «Қостанай таңы» газетінің қызметкерлері дәл осындай ағаш тұқымын отырғызуды келесі жылы да жалғастырып, оны қамқорлыққа алып, баптап-күтпек.

Суретті түсірген Бердіболат Көркембаев