«Нұр себеле, әз-Наурыз!»

Ырыс пен ынтымақтың, береке мен бірліктің мерекесі Ұлыстың ұлы күні Наурыз мейрамын биыл арқалықтықтар он күн қатарынан ұлттық салт – дәстүрді насихаттап, атаулы әр күнді жоғары деңгейде атап өтті. Мекемелер мен ұжымдарда кең көлемде аталып өтілген Наурыз мейрамы қаладағы облыстық қазақ жасөспірімдер театрында «Нұр себеле, әз – Наурыз!» атты мерекелік шарамен жалғасын тапты.

Ұлттық нақышта безендірілген театры фоесінде қала жұртшылығына «Наурыз көже» құйылып, ақ бауырсақ пен палау тегін таратылды.

Сахналандырылған қойылымда Қызыр баба батасын беріп, дәстүрлі шашу шашылды. Салтанатты шақта қала жұртшылығы мен қонақтарын қала әкімі Әмірхан Асанов, «Арқалық – көмір» ЖШС бас директоры Сағидолла Аяп, еңбек ардагері Талғат Ерғалиев құттықтады.

"Биылғы Наурыз мерекесі қарсаңында Қазақстан Республикасының Президенті Қасым –Жомарт Тоқаев «Жаңа Қазастан: Жаңару мен жаңғыру жолы» атты халыққа Жолдауын жариялады. Мемлекеттік басқарудың түрлі реформалары арқылы әлеуметтің әлеуетін көздейтін бұл Жолдау жаппай халықтың қолдауына ие болғаны анық. Жолдауда айтылған он бағыттың әрқайсы өзекті. Олардың орындалуы қоғам мен билік арасындағы тиімді диалогқа негіз болып, тұрғындарымыздың мәселелерін дер кезінде, оңтайлы шешуге жол ашпақ. Олай болса, ортақ мүддеміз «Жаңа Қазақстанды» бірге құру – әрқайсымыздың азаматтық борышымыз болмақ. Халқымыздың жарқын болашаққа деген сенімін арттырып, жақсы жаңалығын ала келген шуақты мерекенің әр шаңыраққа шаттығы мен шапағаты тисін", – деді өз құттықтауында шаһар басшысы Әмірхан Біркенұлы.

Мерекелік концертте «Ақбота» халық би ансамблі және жекелеген өнерпаздар көптеп өнер көрсетті.

 

Мұрат Жүнісұлы

Суреттерді түсірген автор