Газет оқырмандарымен мерейлі

"Қостанай таңы" газетін ес біліп, хат таныған шақтан бері үзбей оқып келемін, яғни өзімді аталмыш басылымның белсенді оқырмандарының бірі санаймын. Түрлі тақырыптарға арналған мақалаларым да газет беттерінде жарияланып келеді. Газеттің шынайы жанашыры болғандықтан,шәкірттерімді де мерзімді басылымдарды оқуға үндеп, санасына қозғау салып отырамын. Мұндай кездері байқайтыным: газет-журнал жаздырып алмайтын отбасылар баршылық екен. Ал қазіргі ақпараттар ғасыры делінетін заманда оқымайтын, жаңалыққа құлақ түрмейтін ата-ананың балаға беретін тәлім-тәрбие-сінің салмағы қаншалықты екенін бағамдай беріңіз. Қайтпек керек? Оқуға енжар балаға мұғалімдер өнеге болса екен дейсің. Өкінішке қарай, білім қызметкерлері арасында да газет бетін ашпайтындар ұшырасады.

Тіршілік атаулы күн шуағынан, жер-судан нәр алып күн кешетіні секілді, соның ішінде сана-сезімі, түйсігі жоғары адамзат баласының ерекшелігі: оқып-білуден рухани азық алады. Көп оқыған адам көп біледі, кез келген ортада өзін жақсы, еркін сезінеді, түрлі-түрлі тақырып төңірегіндегі сөзге араласып, пікірін білдіре алады. Аракідік  шәкірттеріме: "Сұрақ қойыңдар. Бәріне жауап беремін", –  деуім де сондықтан болар.

Ұлы орыс педагогі К.Д.Ушинскийдің "Мұғалім үнемі оқып жүруі керек, ол оқуын тоқтатқан күні мұғалім болудан қалады" деген сөзін мұғалімдер қауымы жақсы біледі. Сондай-ақ көрнекті педагог-жазушы Спандияр Көбеев те мұғалім газет-журнал оқуға үйірсек болуы қажеттігін қадап айт-қан.

Шынында да, жан сарайын жаңғыртуға құлықсыз, жаңалық атаулыдан мақұрым маманның алысқа шаппасы анық. Сондықтан газетке алдымен мұғалімдер жаппай жазылуы тиіс деп санаймын және әріптестерімді туған өңіріміздің төл газеті – "Қостанай таңын" үзбей оқуға шақырамын.

Газет мемлекеттің идеологиялық құралы ғана емес, ол – жан азығы, рухани демеу, ақыл-кеңес берер дос. Өз басым тұшымды мақала оқығанда, жаным жадырап, жаңа білім қосқаныма қуанамын. "Қостанай таңынан" елдік мәселені қозғайтын, сондай-ақ танымал тұлғалар туралы материалдарды қызыға оқимын. Айталық, ғалым Қойшығара Салғараұлымен жүргізілген сұхбатты қиып алып, сақтап қойдым.

"Қостанай таңында" Бейімбет Майлин, Мұхамеджан Сералиндердің нағыз ізбасарлары дерлік, өз ісіне адал, тәжірибелі журналистер жұмыс істейді. Биыл олар қала, аудандарды аралап, біраз еңбек сіңірді. Осындай ауқымды, маңызды шаруа  әкім – қараларға, қарапайым оқырман қауымға, жұртшылыққа қозғау салып, газет таралымы артып жатса, нұр үстіне нұр. Осы орайда "Қостанай таңына" жазылу қазақстандық патриотизмнің де айқын бір белгісі екенін айтып өтсем деймін, Әрине, болғаны жақсы, қалалық "Рудненский рабочийдің" таралымы 8500 екен, ал облыстық мемлекеттік тілдегі төл газетіміздің таралымы одан екі есе асып түссе, кәнеки, ардақты ағайын!

Пиалаш Сүйінкина,

Ы.Алтынсарин атындағы РӘГК оқытушысы, ҚР білім озаты.