Аналар мейрамы айшықталды
Бүгін көктемнің айшықты мерекелерінің бірі – Халықаралық әйелдер күні Арқалық қаласында жоғары деңгейде аталып өтті.
Осыған орай қала әкімдігінде қала әкімі Әмірхан Асановтың төрағалығымен сан түрлі кәсіп көздеріндегі нәзік жандармен кездесу ұйымдастырылды. Іс-шараға қаладағы түрлі кәсіпорындар мен мекемелерде көп жыл еңбек етіп келе жатқан әйелдер қауымының белсенді өкілдері қатысты. Оларға мерекелік дастархан жайылып, құрмет көрсетілді. Қала әкімі жылы лебізін білдірді.
«Мемлекет басшысы Қасым-Жомарт Тоқаев: «Егемен елімізде әйелдер қауымы үшін жаңа мүмкіндіктерге жол ашылды. Отбасы институтын, көп балалы аналарды, кәсіпкер әйелдерді қолдау және гендерлік теңдікті қамтамасыз ету – мемлекеттік саясаттың басымдығы»,- деп атап өткен болатын. Сіздер біздің қоғамдағы бірліктің, жасампаздық пен тұрақтылықтың бейнесіне айналдыңыздар. Әр отбасының береке-бірлігін қалыптастырып, халқымыздың дәстүрі мен салтын, оның мәдениеті мен тарихын, тілін қадірлеуді ұрпақтан-ұрпаққа жеткізіп келе жатқан баршаңызға шынайы ризашылығымды білдіріп, елеулі еңбектеріңізге алғыс айтамын», – деді қала басшысы.
Ә.Асанов қаладағы облыстық қазақ жасөспірімдер театрында аналар мейрамына арналып өткізілген салтанатты жиында да құттықтау сөз сөйлеп, мереке иелеріне сый-сияпаттар табыс етті. ҚР Президентінің Жарлығы бойынша «Алтын алқа» алқасымен жеті және одан да көп бала туған және тәрбиелеп өсірген аналар – Ботакөз Жәкенова, Әлия Мұханбетжанова марапатталды. Ал алты бала туған және тәрбиелеп өсірген аналар – Фариза Әжмағанбетова, Анар Қойбағарова, Жұлдыз Құтмағанбетова, Фатима Мамаделеева «Күміс алқа» иеленді. Мұның сыртында, Қостанай облысы әкімінің мереке қарсаңындағы «Құрмет грамотасы» елеулі еңбегі үшін қала әкімі аппаратының кадр жұмысы бөлімінің басшысы Бақыткүл Мұқышеваға, қалалық мәдениет және тілдерді дамыту бөлімінің басшысы Жанат Қосылбаеваға, Целинный ауылы әкімі аппаратының бас маманы Гүлнұр Ахметке, Аңғар ауылы әкімі аппаратының бас маманы Ақтолқын Досоваға, Ашутасты ауылы әкімі аппаратының бас маманы Жазира Алтынбаеваға, Жалғызтал ауылы әкімі аппаратының бас маманы Ардақ Төлеубаеваға, қалалық жұмыспен қамту және әлеуметтік бағдарламалар бөлімінің әлеуметтік қызметкері Ләззат Танабергеноваға, «Қазақстан» ЖШС медициналық орталығының есепшісі Ольга Железнаяға және басқа да нәзік жандарға табысталды.
Мерекелік концертте ән мен жырдың тиегі ағытылып, күмбірлеген күй де, мың бұралған қыздардың биі де асыл аналардың құрметіне арналды.
Мұрат Жүнісұлы
Суреттерді түсірген автор
