Көше атауы берілмек

Жақында Рудный қаласы көшелерінің біріне Амангелді Жантеміровтың есімі беріледі деген жағымды хабар құлағымды шалды. Ол бойынша қоғамдық тыңдау да өткізіліп, облыс әкімі Нұралы Садуақасов қол қойған ұсыным хат Астанаға жіберіліпті.

Амангелді Мырзахметұлы республикаға еңбегі сіңген белгілі дәрігер, Рудный қаласының құрметті азаматы, «Құрмет Белгісі» орденің иегері. Алматы медицина институтын 1964 жылы бітірісімен жастардың арман қаласына айналған кеншілер шаһарына келеді. Қызметін қатардағы құлақ, тамақ және мұрын дәрігерінен бастаған ол жеке бөлімше ашуға қол жеткізді. 1984-1986 жылдары Ауған соғысына да қатысып, көптің құрметі мен қошеметіне бөленген. Яғни Рудныйдың кез келген көшесін оның есімімен атасақ жарасымды-ақ.

Алайда, айтайын дегенім бұл емес. Бүгінде Рудныйдағы 170-ке жуық көшенің үшеуі ғана қазақтың ұлы тұлғаларымен аталған. Мүмкін емес дерсіз. Себебі Абай, Алтынсарин және Майлин көшелері адам баласы іздесе таппас жеке сектордағы қуыс-қуыс үйлердің арасында орын тепкен. Қарапайым тұрғындар бұндай көшелердің бар екенінен де бейхабар. Амангелді Жантеміровке де осындай 2-3 үйден тұратын көшенің есімі берілмесіне кім кепіл. Меніңше, жоғарыда айтылған Абай, Алтынсарин, Майлин көшелерін де қазақты қорламай жарық, әрі кең көшелерге көшіру заман талабы. Айта-айта осылай қалады. Жоғары отырған ұлтжанды аға-әпкелерім не дейді екен?

 

Қуаныш Есқабыл