Екі командаға бір кубок берілді

Қостанайда Жайдарман ойындарының финалы өтті. Алты команданың арасынан ең көп ұпай жинаған екі ұжым жеңімпаз атанды.

Ойынды Қостанай облысы әкімдігінің жастар мәселелері жөніндегі басқарманың қолдауымен «Ел ертеңі» қоғамдық бірлестігі ұйымдастырды.

«Осы маусымда 28 топ өнер көрсетті. Аймақта жайдарманшылар қатары көбейіп келеді. 2010 жылдары ойын облыс орталығында ғана өтетін. Қазір өңірде бірнеше лига бар», – дейді өңірде өтетін Жайдарман ойындарының тұрақты жүргізушісі әрі ұйымдастырушысы Марғұлан Бәкір.

Финалда алты ұжым бақ сынады. Олар: «Қысқа да нұсқа» (Қостанай қаласынан) «Көкалат», «Торғай облысы» (екеуі де Жанкелдин ауданынан), «Қостомар» (Қостанай ауданынан), «Сарыбай», «Техас» (екі де Рудныйдан).

Көңілді тапқырлар «Сәлемдесу», «Бес жаңалық» және «Үй тапсырмасы» кезеңдерінде бар өнерін ортаға салды.

Ойынды бағалау тәсілі ерекше: қазылар бір командаға берген бағасын екіншіге көрсете алмайды.

Жеңімпаздар мен жүлдгерлерді облыс әкімінің орынбасары Бақыт Есімова марапаттады.

«Осы ойынның гүлі болған «Қысқа да нұсқа» тобындағы кішкентай қыздарымыздың өнері мені тәнті етті. Ауылдардан да жақсы, талантты балалар шығып жатқаны қуантады. Жастардың шығармашылығына көңіл бөліп, бос уақытын тиімді өткізуге үлес қосып жүрген азаматтарға алғыс айтамын», – деді Бақыт Есімова.

Тартысты өткен сайыста «Торғай облысы» мен «Қостомардың» бағы жанды. Оларға 12-ші маусымның ерекше кубогы табысталды. Сонымен қатар, екі топ 500 мың теңге көлемінде ақшалай сыйлыққа ие болды. Үшінші орын «Техасқа» бұйырды.

«Ойынның үздік ойыншысы» атағы торғайлық Жасұлан Қамиға 50 мың теңге берілді.