Облыс орталығындағы «Алтын күз-2014» жәрмеңкесі

Күз – береке мен молшылық маусымы. Содан да болар, осы сәтте ауыл шаруашылығы еңбеккерлері өздері жаз бойы күтіп-баптаған өнімдерін қала тұрғындарына ұсынып, еңбектерінің қайтарымын көреді. Қостанайда екі жаққа да тиімді бастама «Алтын күз-2014» жәрмеңкеcі биыл да тұрақты түрде жалғасын тапты. Жәрмеңкенің басты мақсаты – әрдайым тұтынушының биік талғамы мен сұранысын қанағаттандыру.
Облыс орталығындағы Сити- орталықтағы  жәрмеңкеге төрт түліктің еті, жал-жая, қазы-қарта, балықтың түрлері, айран, ірімшік, қаймақ, сүзбе, бал, күріш, тағы басқа көкөніс, жеміс-жидектің түр-түрі қойылған. Бағасы базардан 15-20 пайыз төмен, әрі экологиялық жағынан таза.

Мәселен, Меңдіқара  ауданы жәрмеңкеге ауылшаруашылық өнімінің 30-ға жуық түрін қойса, қарасулықтар одан да асып түскен. Облыс аудандарының жеке қожалықтары өндірген өнімдерінің сапасына қостанайлықтар дән риза.

Айта кетер бір жай, шаһар тұрғындарының арасында дәмі тіл үйірген алманың түр-түрі, бал, жаңа ғана сойылған жылқы, қой мен сиырдың еті, бау-бақша өнімдері мен жұмыртқаға деген сұраныс жоғары. Мұндағы  тауықтың жұмырқасының 10 дансын 160 теңгемен  сатып алуға кезекке тұрған халықтың санынан көз сүрінеді.

Мұндай іс-шараны ұйымдастырудағы басты мақсат – ауыл еңбеккерлері өсіріп, күтіп-баптаған өнімдерін тұтынушыға уақытылы әрі қол жетімді бағамен жеткізу. Сонда ғана төккен тердің қайтарымына қол жеткізіліп, қалалықтар қысқа азықтық қор жинайды. Жәрмеңке аясында жергілікті өнер жұлдыздары асқақтата ән шырқап, күмібірлетте күй тарты.

 

Мешіт Ғазиз