Заречныйда балабақша ашылды
Бүгін Қостанай ауданының Заречный ауылында «Әдемі» балабақшасы ашылды.
ҚР Тәуелсіздік күніне орай ұйымдастырылған бөбекжайдың салтанатты ашылу салтанатына облыстық білім басқармасының басшысы Зәуре Байменова мен Қостанай ауданының әкімі Жансұлтан Таукенов қатысты.
Тоқсан орындық балабақша Северный шағын ауданында орналасқан. Нысан жеке инвестициялар есебінен салынды. Мектепке дейінгі тәрбие мен оқытуға мемлекет тарапынан қолдау көрсетілетін болады.
«Қостанай ауданында 7 балабақша (оның екеуі жеке) бар. 900-ден астам бала қамтылып отыр. Сондай-ақ, мыңнан артық баланы қамтитын 44 мектепке дейінгі шағын орталық жұмыс істеп тұр. Бүгін жаңа балабақшада 19 жұмыс орны ашылды», – деп атап өтті аудан әкімі Ж.Таукенов.
Бүгінде Қостанай облысында 31 мыңнан астам (31 697) бала 579 балабақша мен шағын орталыққа барып жүр. Оның ішінде 7 мыңнан астам бала (7 308) тәрбиеленетін 76 жеке ұйым жұмыс істейді.
