8 мың мұғалім диктант жазды
Қостанай облысының 8 мыңнан астам педагогы «Абай Құнанбайұлы – ұлы тұлға» тақырыбында диктант жазды. Бұл туралы облыстық Білім басқармасының "Фейсбук"желісіндегі парақшасында жазылды.
Басқарманың әдістемелік кабинеті ұлы Абайдың 175 жылдығына арналған он күндік шеңберінде мұғалімдерге мектеп партасына отыруды ұсынған-ды. Диктантқа тек пән мұғалімдері қатысты.
"Жалпы, өңір бойынша диктантты 819 білім беру ұймының 8041 педагогы жазды, – дейді облыстық Білім басқармасының мектепке дейінгі және жалпы орта білім беру әдістемелік кабинетінің өкілі Сәуле Дастанбаева. – "Рухани жаңғыру" республикалық сайтының шығарушы редакторы Сұлтан Мұстафиннің "Хакімнің өмірі, шығармашылығы, ойы мен мектебі жайлы аз-кем ой" атты мақаласы үзіндісінің қазақ тіліндегі аудиожазбасы 14 қазанда біздің сайтта орналастырылды. Дәл сол күні әр қатысушы оны тыңдап, содан кейін сканерленген түрде жазылған жұмысын бізге тексеруге жіберді. Қорытындылай келе, қатысушылардың 85 пайызы диктантты "үздік" бағаға жазды. Осы іс-шараның мақсаты – қазақ әліпбиін насихаттау, сонымен қатар бүгінде өзекті болып отырған ұлы ойшыл мен ақынның адамгершілік-философиялық ойларына мұғалімдердің назарын тағы да аудару болды".
