Торғайға ат шалдырды

Қазақстан Республикасы Парламенті Мәжілісінің депутаты Әлия Сапарова жұмыс сапарымен Жангелдин ауданына барды. Бұл туралы "Нұр Отан" партиясының аудандық филиалының хатшысы Ғабит Сүндетбаев "Фейсбук" желісіндегі парақшасында хабарлады.

"Әлия Сүйіндікқызы аудан орталығындағы Коммуналдық шаруашылық кәсіпорынында, Н.Ахметбеков атындағы Мәдениет үйінде ауданның мәдениет саласы қызметкерлерімен кездесу өткізді, сондай-ақ аталмыш ғимараттың бос аумағынан жас кәсіпкердің қайтарымсыз несие қаржысына ашқан "Әдемі" балалар ойын алаңқайымен танысты. Сонымен бірге, депутат "Nur Otan" партиясының Жангелдин аудандық филиалының Қоғамдық қабылдау бөлмесінде қабылдау жүргізді. Жұмыс сапарын шалғайдағы "Көлқамыс" ауылына ат басын бұрып, тұрғындармен ауыл клубында кездесу өткізді. Парламент қабырғасында қабылданған жаңа Заңдар турасында және өзгерістер мен толықтырулар туралы түсінік берді. Қатысушылардың сұрақтарына тұшымды жауаптар қайтарып, ұсыныс-пікірлерін қаперге алатынын жеткізді. Айса Нұрманов атындағы негізгі мектеппен танысып, ауыл кітапханасын көрді. "Ауыл – ел бесігі" ұстанымына терең мән берген жерде даму барына көз жеткізген халық қалаулысы Қостанай облыстық мәслихатының депутаты Манат Карбозовтың шаруашылығымен танысып, қонысына қазақы дәстүрмен құтты болсын айтуды ұмытқан жоқ. Өңірдің алыс шалғайында жатқан ауыл тұрғындарымен кездесуге жеткен депутатына ауыл халқы атынан ақсақалдар алғыстары мен батасын беріп, ілтипатпен шығарып салды", – делінеді жазбада.