AIMAQTA QANDAI HABAR BAR?

Ekpe maýsymy bastalady
Oblysta. Aldaǵy aptada oblys turǵyndary maýsymdyq tumaýǵa qarsy tegin ekpe jasata alady. Bul úshin arnaıy preparattyń 65 myń dozasy satyp alynǵan. Tumaý jáne A gepatıtine qarsy vasına alýǵa 174 mln teńge jumsaldy. Jergilikti búdjettiń taǵy 170 mln teńgesi sıre kezdesetin aýrýlarmen kúresetin dáriler satyp alýǵa bólindi. Keler jyly tegin dáriler tizimi kóbeımek.

Bereshek belsheden

Qostanaı. Turǵyndardyń jylý men ystyq sýǵa qaryzy 384 mln teńgege jetti. Munyń 90%-i ótken jyldardan qalǵan. Komýnaldyq kásiporynǵa 70 myńnan astam abonent bereshek. QJEK boryshkerlermen kúres júrgizýde. Sotqa 85 mln teńgeniń 1623 shaǵymy berilip, 1063 sot aktisi shyǵarylǵan. Qaryz arqalaǵandardyń múlikteri tárkilenip, syrtqa shyǵýǵa tyıym salynyp, bankilik shottaryna buǵaý salynady.

Jasyryn sheberhana áshkerelendi
Rýdnyı. Qarý jasaıtyn sheberhana uıymdastyrǵandar sottaldy. Aıypty D.Basakın men A.Stenınge atys qarýy men jarylǵysh zattardy zańsyz saýdalaǵany úshin úkim shyǵaryldy. Qazirgi tańda kinálilerdiń biri izdestirilýde. QR UQK Qostanaı oblysy boıynsha departamentiniń qyzmetkerleri atalmysh qylmyskerlerdi salmaǵy 2 keli «amonıt» jarylǵysh zatyn, sondaı-aq jaýyngerlik tapanshany ótkizý kezinde ustaý boıynsha operasıa júrgizdi.

Tártipsiz tártip saqshysy
Meńdiqara. Aýdandaǵy qylmystyq tergeý bólimi basshysy M.Mýsın Qostanaıda jol erejesin buzǵany úshin qyzmetinen qýyldy. Ol kólik tizginine mas kúıinde otyrǵan. Ol "Mısýbısıimen" baǵdarsham túbinde turǵan VAZ-2110 kóligin soqqan. Ol VAZ-2107 kóligine soǵylyp, jolaýshy jaraqat alǵan. Aıypker máseleni aqshamen sheshkisi keldi. Qazir qamaýda.

Tulǵaǵa taǵzym
Uzynkól. Sývorov selolyq okrýginde Sataı bı Qaramyrzaulyna arnalǵan memorıal ashyldy. Ýaq rýynan shyqqan áıgili qazy qazirgi sottyń rólin atqarǵan, jasaq basqarǵan, el bılegen tarıhı tulǵa. Tátiqara jyraýdyń ákesi retinde de belgili. Jergilikti jurttyń bastamasymen keler jyly Sývorov aýylyna Sataı bıdiń aty berilmek.

Joldaý nasıhattaldy
Amangeldi. QR Prezıdenti Q.Toqaevtyń halyqqa arnaǵan Joldaýyndaǵy negizgi baǵyttardy nasıhattaý jáne túsindirý maqsatynda aýdandyq aqparattyq-túsindirý toby Qarasý aýyldyq okrýgine baryp, turǵyndarmen júzdesti. Top quramynda aýdandyq bólim basshylary, máslıhat depýtaty jáne aýyl ákimi boldy. Kezdesýde turǵyndar úgitshilerge joldaýda qamtylǵan birqatar másele jóninde suraqtaryn qoıdy. Olarǵa málimetter men aqparattar berildi.

Balyq qyrǵyny
Áýlıekól. Qusmuryn aýylyndaǵy Obaǵan ózeninde balyqtar qyryldy. Basym bóligi – taban balyǵy, Olarǵa qyzamyq aýrýy tıgen bolýy múmkin. Jergilikti bılik ókilderi óli balyqtardyń satylymǵa shyǵyp ketýinen qaýiptenip otyr. Qazir oblystyń mamandary kelip, synama aldy. Qyrylǵan balyqtardyń jalpy salmaǵy 90 kelige jýyqtaıdy.