“NUR OTAN” – ЖАҢҒЫРУ ЖОЛЫНДА

Елордада "Nur Otan" пар­тиясының Төрағасы Нұрсұлтан Назарбаевтың басшылығымен партия Саяси кеңесінің кеңейтілген отырысы өтті. 

Жиынға Мемлекет басшы­сы Қасым-Жомарт Тоқаев, Премьер-Министр Асқар Мамин, Үкімет мүшелері, партия­ның Мәжілістегі фракция­сы, "Jas Otan" жастар қа­на­тының, партияның облыс­тық фи­лиал­­­дарының жетек­шілері қатыс­ты деп хабарлайды "egemen.kz" порталы.

Елбасы өзінің кіріспе сөзінде биыл елімізде Nur Otan партиясының бастамасымен ауқымды шаралардың өткеніне тоқталды. Бір жыл ішінде партияның екі съезі өткізіліп, 20 жылдығы аталып өтілді, ал маусым айында Президент сайлауында Nur Otan партиясының кандидаты Қасым-Жомарт Тоқаев жеңіске жетіп, Президент атанды.

Кеңейтілген отырыста Ел­басы Нұрсұлтан Назарбаев Nur Otan партия­сының жұмысын жаңғырту жөнінде сөз қозғап, партияның сайлауалды бағ­дар­ла­масы мен съездерде қа­былданған шешім­дерінің орындалу барысына тоқталды.

– Партиямыздың дамудың жаңа кезеңіне қадам басқанын бәріміз түсініп отырмыз. Nur Otan еліміздің жетекші күші ре­тінде саяси басшылықты бекем­деп, стратегиялық бағыттан ауыт­қымауы үшін бүкіл қоғамды жұмылдыруы тиіс. Бұл бос ай­тылған сөз емес. Біз – Қазақ­станның, халықтың ортасын­дағы елді алға жетелейтін ұйым­быз. Егер ондай маңызды мін­деттің үдесінен шыға алмасақ, орнымызды басқа партия басады. Сондықтан жауапкершілікті барынша сезінуіміз керек, – деді Тұңғыш Президент. – Партия проблемаларды нақты шешу жолдарын ұсынып, тиімді жұмыс істеуі керек. Сонда партияның беделі асып, халықтың қолдауына ие болады. Үкімет пен барлық атқа­рушы билік білек сыбанып, Nur Otan партиясының және сай­ланған Президент Қасым-Жомарт Тоқаевтың сайлауалды уәделерін орындай отырып, елдің алдында тұрған нақты мәселелерін шешуі тиіс.

Nur Otan партиясының төр­ағасы 2018 жылы сайлау заң­намасы жетілдірілгенін, алдағы сайлаулар конституциялық мерзімде өтетінін және мәс­ли­хаттардың келесі сайлауы алғаш рет Мәжілістегідей пар­тиялық тізім бойынша өткізі­летінін мәлімдеді. Осы ретте Елбасы партия жекелеген оп­поненттердің, блогерлердің бұрынғы мажоритарлық жүйеге оралу, мерзімінен бұрын сайлау өткізу туралы пікірлеріне жа­уап беру керектігін, мажо­ри­тар­лық жүйеге көшуді қол­дап жүргендердің нақты ұсы­ныс­тары жоқтығын, билікті сынап сөйлегендері бос сөз ғана екенін айтты.

– Партия проблемаларды нақты шешу жолдарын ұсынып, тиімді жұмыс істеуі керек. Сонда партияның беделі асып, халықтың қолдауына ие болады. Жалпы экономикалық және саяси өрлеуде дамыған елдердің тәжірибесіне сүйенгеніміз жөн. Алдымен дамудың негізі – сая­си тұрақтылық пен қоғамдық ке­лісім. Ал дағдарыстар кезеңін­де жүйені іштей және сырттай сілку өте қауіпті. Қайта оны нығайтып, жұдырықтай жұ­мы­лып, алға жылжуымыз қажет. Екіншіден, ортақ табысқа қол жеткізу үшін қоғамның тұтастығын бекітіп, халықтың жай-күйін түсінетін мықты көшбасшы және күшті партия қажет. Елдегі тұрақтылықтың сақталуына мүдделі келетін орта таптың үлесін арттыру – басым бағыт. Өз үйі, жұмысы, тұрақты табысы бар бұл таптың өкілдері елдің тыныштығын қалайды. Бізге стратегиялық бағыттың осындай бірізділігі керек, – деді Нұрсұлтан Назарбаев.

Тұңғыш Президент алдағы сайлаулардың алдында пар­тия­ның жұмысын жүйелі жаңғырту бағдарламасын ұсынып, оны «Сенім. Диалог. Болашаққа нық қадам – Nur Otan партиясының 7 серпіні» деп атады.

– Сыбайлас жемқорлыққа қарсы күресті түбегейлі кү­шей­­тіп, тазалық жүргізу қажет. Мұ­ны жиі қозғап жүрміз. Сай­лан­ған Президент те бұл туралы айтты. Аталған бағытта жұ­мыстар атқарылып жатыр. Бірақ бұған халықтың өзі де атса­лысу керек. Батыстың үздік университеттерінде оқыған 10 мың қазақстандық сынақта ақша беру дегенді кездестірмеді. Ал бізде мұндай жағдай әлі де бар. Балалары оқуға түссе, артынан ауылдағылар соғымын да беріп жібереді. Ректорлармен жұмысты күшейту керек, – деді партия Төрағасы.

Тұңғыш Президент Нұрсұлтан Назарбаев Мәжілістегі фрак­цияның жетекшісі лауазымына Мәжіліс Төрағасы Нұрлан Нығ­матулиннің кандидатурасын ұсынды. Мәжіліс спикері ретінде Н.Нығматулин алға қойылған мақсаттарға қол жеткізу және фракция жұмысын қайта жандандыру үшін барлық ресурстарды жұмылдыра алатынын жеткізді.

Сонымен қатар Тұңғыш Президент мәселелерді шешу үшін заңнамалық бастамаларды белсенді түрде іске асыру керектігін айтып, өңірлердің дамуына нақты ықпал ете ала­тын мәслихаттардың жұмы­сына тоқталды. Заңнамаға сәйкес мәслихаттар бюджет­ті, жергілікті даму бағдарлама­ларын бақылап отырады. Бірақ Елбасы бүгінгі таңда өз дең­гейін­де тиімді жұмыс істеп отыр­­маған мәслихаттарды қатты сынға алды.

Нұрсұлтан Назарбаев халықпен нақты жұ­мыс істеу қағидатын енгізуді, қар­қынды ақпараттық-идеоло­гиялық жұмысты ұйымдас­ты­руды және партия төңірегіне жастарды біріктіру үшін шаралар қабылдауды ұсынды.

Бұған қоса Қазақстанның Тұңғыш Президенті ел алдын­да тұрған экономикалық проб­лемаларға тоқталып, тұрақты өсімді қамтамасыз ететін жа­ңа шаралар ұсынды. Атап айт­қанда Елбасы бизнес үшін са­лық ауырт­палығын төмендету арқылы эко­номикаға салықтық ынталандыру тетіктерін енгізуді ұсынды.

Елбасы кеңесте бұқаралық ақпарат құралдарының рөлі туралы да сөз қозғап, әртүрлі жолдармен сыни материалдардың жолын кесетін шенеуніктердің баспасөзге қысым жасауын доғару керектігіне тоқталды. «Егер осындай жағдай тіркелсе, қандай лауазымда болса да жұмыстан шығарамыз. Кім болса, ол болсын», деді Елбасы.

Тұңғыш Президенттің осы сөзі және Саяси кеңес бю­ро­сының құрамына алғаш рет БАҚ басшысының кіруі отандық баспасөздің мәртебесін көтеріп қана қоймай, жалпы осы салаға да зор жауапкершілік жүгі артылатынын байқатты.