ЖЕРЛЕСІМІЗ ЖҮЛДЕГЕР

Алматыда демалыс күндері белдесуден "Халық барысы" атты республикалық турнир өтті. Екінші рет өткізілген қазақ күресінің бұл түрінен бақ сынауға елдің барлық аймағынан 1 мыңға жуық балуан қатысқан. Қостанай облысының намысын Талғат Жиентаев қорғауға барды. Ол былтыр осындай жарыстан 2-орын иеленген еді. Осы жолы да сол жетістігін қайталады. Жарыстың алғашқы күнінде олар іріктеу кезеңінен өтті. Екінші күні 32 балуан өзара күш сынасты. Жерлесіміз Талғат бәсекелестерін асықша иіріп атып, финалға дейін қарсылас шыдатпай келді.  Тек ақырғы сында алматылық Дәурен Нұралиновқа есе жіберіп алды. Осылайша, өткен жылғы жетістігін қайталап, 2-орынды місе тұтты. Ол 4,5 млн теңге, диплом, медаль, шапан сыйға тартылды. Жаттықтырушысы әрі туған бауыры Жиентаев Тоқтарға 500 мың теңге берілді.

Ал І орын иеленген Дәурен Нұралинов 9 млн теңгені қоржынға басты. Жаттықтырушысы Қиқымов Мақсатқа 1 млн теңге берілді. ІІІ орындағы Ғалымжан Қырықбаевқа (Жамбыл облысы) 2,7 млн теңге табыс етілді. Жаттықтырушысы Ақбергенов Бахтиярға 300 мың теңге табысталды.  ІV орын алған Ернар Мағауиновқа да (Алматы қаласы) жүлде тағайындалған –  1,8 млн теңге олжалады.      

Айта кетейік, турнир «Рухани жаңғыру» мақаласын іске асыру, ұмыт қалған көне балуандық өнер түрін қайта жаңғыртуды жүзеге асыру, жастарды спортқа тарту, қазақ халқын ұлттық спорт түрлерін насихаттап, спорттық салт-дәстүрін сақтауға жұмылдыру мақсатында ұйымдастырылған. Халық арасынан шығатын барысты анықтау шарасын ҚР Мәдениет және спорт министрлігі, ҚР Қазақ күресі федерациясы және «Қазақстан Барысы» қазақ күресін дамыту қоры Алматы қаласы әкімдігінің қолдауымен өткізді. Күрес мерекесіне ҚР Мәдениет және спорт вице-министрі Е.Рамазанов, Алматы қаласының әкімі Б.Байбек, Мәскеу олимпиадасының жеңімпазы Ж.Үшкемпіров, ҚР еңбек сіңірген спорт қайраткері Д.Биткөзов, ҚР Қазақ күресі федерациясының президенті А.Шораевтар қатысты. Сондай-ақ, шара барысында «Алашұлы», «Ұлытау», «Тұран», «Алдаспан» топтары өнер көрсетіп, ұлттық құндылықтар мен атрибуттар насихатталатын театрландырылған шоу және акробатикалық көрсетілімдер, ат үстіндегі ұлттық спорт түрлерінің ерекшеліктері, семсерлесу көрсетілді.