35 ауыл тасқынға дайын емес
Тасқын қаупіне бетпе-бет келуге барлық аудан тас-түйін дайын болмай шықты. ТЖД қызметкерлері кейбір селолық округтер әкімдеріне жазбаша ескерту жолдады.
![таскын](https://old.kostanaytany.kz/wp-content/uploads/2019/04/taskyin1.jpg)
Күн бұрын ТЖД қызметкерлері полицейлермен және жергілікті атқарушы органдармен бірлесіп, кезекті рейд өткізді. Мамандардың анықтауынша, 35 елді мекенде қар тазалау жұмыстары жүргізілмеген, ал арықтар мен суағарлар күл-қоқыстан тазартылмаған. Бұл, мәселен, өзен суы арнасынан асқан жағдайда тұрғын үйлердің апатқа душар болуына себепкер болуы мүмкін. Осы себептен селолық округтердің әкімдеріне қатаң ескерту жасалды. Сондай-ақ, 36 жеке тұлға, санамалап айтсақ, Қостанайдан 10, Қарабалық ауданынан 5, Алтынсарин ауданынан 10, Сарыкөлден 5, Федоровтан 6 адам әкімшілік жауапкершілікке тартылды.
Жалпы алғанда, облыс бойынша 116 елді мекен тексерілді.