Әлеуметтік желі арқылы өсек таратқандарға жаза күшейді

2015 жылдың 1 қаңтарынан бастап жаңа Қылмыстық, Қылмыстық іс жүргізу, Қылмыстық атқару және Әкімшілік құқықбұзушылық туралы кодекстер заңды күшіне енді. Бұл туралы "Казахстанская правда" газетіне сілтеме жасап Алаш айнасы хабарлайды.

Жаңа Қылмыстық кодекске сәйкес, қауесет таратқан адамдар қылмыстық жауапкершілікке тартылатын болады. Қылмыстық кодекстегі "Жалған мәлімет тарату" деп аталатын бапта ең ауыр жаза ретінде 10 жылға дейін бас бостандығынан айыру көзделген. Нақтылап айтсақ, БАҚ-тар немесе әлеуметтік желілер арқылы өсек таратқан адамға 5 000 айлық есептік көрсеткіш көлемінде айыппұл салу, тура осындай көлемде түзету жұмыстарына жіберілу, бас бостандығынан 2 жылдан 5 жылға дейін шектелуі немесе бас бостандығынан айырылуы мүмкін. Сонымен қатар, жаңа технологияны пайдалана отырып, лаңкестік және экстремизм көрінісін, радикал идеологияны таратуға жауапкершілік қатаңдай түсті.

Шетелдердегі қарулы қақтығыстарға қатысқан адам қылмыстық жазаға тартылады, бұл туралы бапта 3 жылдан 7 жылға дейін бас бостандығынан айыру жазасы  қарастырылған.

Ш.Аңсағанқызы