AIMAQTA QANDAI HABAR BAR?
Qarǵyn sý taıap keledi
Oblysta. TJD baspasóz qyzmetiniń habarlaýynsha, oblys kóleminde qar kúrt erı bastaıdy. 26-29 naýryz aralyǵynda aýa raıy jylyp, jańbyr jaýýyna baılanysty, qar belsendi erip, jaıylma sý júrip, toń-muz juqarady. Boljam boıynsha, ózender sýynyń deńgeıi kóteriledi.
Ortalyq mach bizdiń alańda
Qostanaı. "Aqtóbe" fýtbol klýbynyń qosymsha stadıonynyń bolmaýyna baılanysty, "Aqtóbe"-"Qaırat" machy Qostanaıda ótedi. Kezdesý 31 naýryzda saǵat 14:00-ge belgilengen. Ótetin orny – "Tobyl-Arena". Bul stadıonǵa 8, 10, 38 avtobýstarymen jetýge bolady.
Eski nysan – jańa balabaqsha
Qarasý. Qazaqstannyń Eńbek Eri Almat Tursynov aýdandyq bilim bóliminiń ıeligine eski nysandy berdi. "Nur sábı" dep atalmaq bolashaq balabaqshanyń jóndeý jumystary júrip jatyr. Oǵan "ASTANA GRAND TRADE" JSHS 13 mln qarjy quıdy. Mekeme 1 qyrkúıekte bóbekterge esigin aıqara ashpaq. Resmı ashylýy aýdannyń 80 jyldyǵy qarsańynda, 27 shildede ótpek.
Rýslanǵa shuǵyl kómek kerek
Qarabalyq. Smırnov aýylynda turatyn Rýslan Jumaqanov járdemge muqtaj. Jetkinshek qan obyryna shaldyqqan. Taıaýda ol ekinshi márte em qabyldaýǵa barady. Bul joly Túrkıaǵa jiberilmek. Ol jaqta jilik maıy aýystyrylady. Rýslanǵa jeńildik qarastyrylǵan. Biraq qosymsha shyǵyndar úshin 300 myń teńge qajet. Ata-anasynyń jaǵdaıy jetpeıdi. Aýdandyq "Meıirim men úmit sáýlesi" qory alǵashqy bolyp 88 720 teńge bóldi.
İzi sýyp úlgermedi
Rýdnyı. Qaraqshylyq shabýyldyń qurbany bola jazdaǵan áıel tártip saqshylaryna alǵys bildirdi. Janarmaı quıý beketinde isteıtin ony beıtanys er adam pyshaqpen qorqytyp, aqshasyn tartyp áketken. Qońyraý túsisimen, polıseıler qylmyskerdi alysqa uzatpaı qolǵa túsirdi.
Kekilderin jel taraǵan…
Áýlıekól. Naýryz meıramyna arnalyp at jarysy uıymdastyryldy. Báıge 2 jáne 6 shaqyrym qashyqtyqta ótti. Qunan báıgede 1-oryndy Darhan Asqardyń júırigi jeńip aldy. Taı jarysqa qatysqan alty qylquıryqtyń ishinen Ahmet Masaev baptaǵan sáıgúlik qara úzip keldi. Jeńimpazdarǵa qoı jáne plazmalyq televızor tabystaldy. Sońy ózge de ulttyq oıyndarǵa ulasty.
Mesenattar forýmy ótti
Amangeldi. Forým «Qaıyrymdy el» dep atalady. Oǵan aýdan basshylyǵy, jergilikti sharýa qojalary, kásipkerler qatysty. Jıyn barysynda aldaǵy Jastar jylynda júzege asyrylatyn jobalar tanystyryldy. Qatysýshylar biraýyzdan qoldaý bildirdi. Aýdan ákimi Á.Asanov óńirdiń damýyna úles qosqan azamattardy "Jomart júrek" statýetkasymen marapattady.
