Қолда барға қолдау аз
Қарабалық ауданының бокс мектебі әуелден әлеуетті. Облыстың намысын байрақты бәсекелерде қорғауға лайық талай былғары қолғап шеберлерін шығарды. Қазіргі "түбітқанат" талапкерлердің де табысы, аяқ алысы жақсы. Аудан орталығындағы бокс мектебі жас та болса жұдырығы мығым жеңіскер жеткіншектерімен мақтанады. Тек…
Әрине, спорт болған соң түрлі сайыстарға үнемі қатысып тұру керек. Талпыныс, тәжірибе сол арқылы келеді. Жұдырықтай жүрегінде жалын ойнақтаған жас буын да мектеп ауласында қалып қойғысы келмейді. Жиі-жиі аудандікінен әлдеқайда биік рингтерде шиыршық атқысы бар. Бірақ, өкінішке қарай, алыс-жақын өңірлердегі, республикалық, халықаралық деңгейдегі жарыстарға жас ұландарды қалдырмай қатыстыру қиынның қиынына айналып отыр.
– Дәме бар да дәрмен жоқ. Қол қысқа. Күн қолы ашық демеушілерге қарап қалды, жасырары жоқ. Оларды қашанғы сағалай бересіз? Аудандық спорт бөлімінде біздің талап-тілегімізді орындардай мүмкіндік жоқ. Өздерінің ұдайы айтуларынша солай. Бұрын мектебіміз тікелей облыстық басқармаға қарап тұрған кезде мұндай мәселе мүлде болмаған еді. Қалаған жарысымызға қиналыссыз қатысып, өзіміз де, шәкірттеріміз де қанаттанып жүруші едік. Қаншама чемпион шынашақтайынан жарқырай көрінді! Ал қазіргі күні бокс спортына деген қолдау көңілді көншітпей отыр. Бокс қана емес, доп спортына, ұлттық ойындарға лайықты деңгейде назар бөлінеді деп айту қиын, – дейді аудандық балалар мен жасөспірімдер спорт мектебінің директоры Батырхан Әлиев.
Дей тұрғанмен "мәселе осы екен" деп дайындық-жаттығуларды саябырсытып қойған олар жоқ. 4 бапкер қарабалықтық балалар мен жасөспірімдерді аптасына 4 рет бокс жаттығуынан өткізеді. Талапкерлердің көптігі сонша – әр бапкерде үш топтан бар. 
Төгілген тер, жұмсалған күш өтеусіз де емес. Мақтаныш етіп айтар кішкентай чемпиондар көп. Мәселен, 13 жастағы Бекзат Сапарғали – облыстың бірнеше дүркін чемпионы. Осы кезге дейін 48 жекпе-жек өткізіп, бәрін жеңіспен аяқтаған. Ең жарқын жеңістері – Ресейдің Оңтүстік Орал қалалық округінде және Троицкіде өткен турнирлер жүлдесі. Бекзат сол жерлерде жеңімпаз атанып қана қоймай, "Үздік техника үшін" медалін екі рет иеленген. 
Осындай жетістіктермен жарқырап, қоржынын медальге толтырған Қуаныш Ақсәулет, Мұхаммед Мұқанов, Жәмила Әлиева сынды жас чемпиондар болашақтан үлкен үміт күттіреді. 
Тек, бапкерлердің тілегі де сол, көп жарыстан шетқақпай қала бермей, олар үнемі тыс алаңдарда ширығып-шыңдалулары керек. Таяу келешекте араларынан ел байрағын әлемдік деңгейде көтерер саңлақтар шықпасына кім кепіл! 
Суреттерді түсірген Бердіболат Көркембаев
