Тұңғыш рет кәсіподақ шыршасы өтті

Жаңа жыл қарсаңында білім беру қызметкерлерінің кәсіподағы Қостанай облысы білім басқармасымен бірлесіп6 облыстың білім беру қызметкерлерінің балаларына арналған  «Жарқыра6 Қазақстан, жарқыра6 туған жер» атты балалар шыршасын өткізді.

Мерекелік іс-шараға 500-ден астам бала қатысты. Оларға "Карнавал" би ансамблі мен цирк әртістері мерекелік көңіл-күй сыйлады.

–Біздің ұйымның құрылғанына бар болғаны төрт ай. Басты бағытымыз – балалармен жұмыс істеу. Кәсіподақ шыршасы жыл сайын дәстүрлі түрде өткізілетін болады. Оған облыстың барлық балалары қатысуы тиіс. Өйткені, біздің өңірде 30 мыңнан астам адам білім саласында жұмыс істейді, – деді Қостанай облысының білім және ғылым ұйымдары қызметкерлерінің жергілікті кәсіподағының төрайымы Татьяна Ескендирова.

 

Салтанатты шара барысында жүрекке жылу ұялатып, қуаныш сыйлайтын жаңажылдық түрлі қойылымдар көрсетілді. Мерекелік шарада өнерпаз оқушылар өнерін көрсетіп, ән мен биден шашу шашты. Өз өнерін көрсеткен балғындарға Аяз ата мен Ақшақар сыйлықтарын ұсынды. Шырша кеші соңында өрендер шыршаны айнала би билеп, көтеріңкі көңіл-күйде тарқасты.

Әсел Қибаш