Автоөндіріс аясындағы әріптестік

11 қараша күні Қостанайда автокөлік құрастыратын AllurGroup пен қытайлық Genertec (ChinaGeneralTechnologyGroup) тобына енетін СМС (ChinaNationalMahcinery IMP.& EXP. CORP) компаниясы автоөндірісті дамыту және импорт пен экспорт мәселесін  бірлесе отырып реттеу туралы инвестициялық келісімге қол қойды. Енді «AllurGroup» автохолдингі акциясының 51%-і қытайлық компанияға тиесілі болмақ. «Genertec» отандық автоөндіріс саласына 10 жыл ішінде жалпы көлемі $1,1 млрд. қаржы салуға ниетті. Осыған орай, қытайлық компания басшылары Қостанайға келіп, «СарыарқаАвтоПром» ЖШС-інің өндіріс алаңдарымен танысты. Одан кейін облыс әкімімен кездесіп, бірлескен жобаны жүзеге асыру жолдарын талқылады. Архимед Мұхамбетов автокөлік өнеркәсібі елімізде соңғы жылдары қарқынды дамып келе жатқан сала екенін атап өтіп, былтырғымен салыстырғанда, биыл Қостанайда автокөлік өндірісі екі есеге ұлғайғанын айтты.

– «СарыарқаАвтоПром» ЖШС 2010 жылдан бері 40 мыңнан астам автокөлік жасап шығарды. «AllurGroup» компаниясы капиталына серіктес-инвестордың енуі  – отандық автокәсіптің дамуына тың серпін беретін аса маңызды  стратегиялық жоба. Мұны мемлекет басшысының өзі тікелей қадағалап отыр. Бұл Қазақстан мен Қытай ынтымақтастығы аясында жасалған 55 басым жобаның тізіміне енеді. Біз «Genertec» – қытайдың мемлекеттік трансұлттық компаниясы екенін білеміз. Компания машина жасау, медициналық құралдар мен дәрі-дәрмек шығару, жеңіл өнеркәсіп пен құрылыс және жылжымайтын мүлік, сондай-ақ техникалық консалтинг салаларын қамтиды. Біз аталған жобаға осындай аса ірі компанияның қатысқанына қуаныштымыз. Бірлескен жоба отандық машина жасау саласының жаңа деңгейге көтерілуіне ықпал етіп, Қостанайда құрастырылатын автокөліктерді экспортқа шығаруға жол ашады. Бұл үшін бізде барлық мүмкіндік қарастырылған. Облыста аумағы 400 га болатын индустриялық аймақ бар. Ол жуық арада еркін экономикалық аймақ мәртебесіне ие болады. Қазір ол жерде құны 300 млрд теңге болатын 11 жоба іске қосылған. Бұл жобалар 2 мыңнан астам адамды тұрақты жұмыспен қамтып отыр, – деді өңір басшысы.

«Genertec» пен «СарыарқаАвтоПром» автоөнеркәсіп әлеуетін арттырып, автокөлік құрастыру саласындағы қазақстандық үлесті 50%-ке жеткізуді көздеп отыр. «Genertec» компаниясының басқарма төрағасы Лу Йимин ашық қабақ танытып, бірлескен жобаға қолдау көрсеткені үшін облыс әкіміне алғысын айтып, қостанайлық автоөнеркәсіпті дәуірлеу кезеңі күтіп тұрғанын, болашақта өндіріске жаңа технологияның ең озық үлгілері енгізілетінін айтты.

           

«СарыарқаАвтоПром» келесі жылы  JAC автокөлігінің S7, Т6 пикап үлгілерін шығаруды қолға алады. Ал 2019-2021 жылдар аралығында JAC, ANKAI, HOWO, HANTENG автокөліктері мен автобустар құрастырылады. 2023 жылға қарай Қостанайда жылына, кем дегенде, 60 мың автокөлік шығару көзделіп отыр.

 

Нұрқанат Құлабаев

Суреттерді түсірген Бағдат Ахметбеков