Жерлестеріміз жеңімпаз
Рудныйда Тəуелсіздік күні мен энергетиктердің төл мерекесі қарсаңында «KEGOC» АҚ қызметкерлерінің спартакиадасы өтті. Екі күнге созылған дәстүрлі шараға еліміздің түкпір-түкпірінен 11 құрама команда келіп, спорттың шағын футбол, волейбол, үстел теннисі, армрестлинг және шахмат сияқты түрлерінен өзара додаға түсті.
Бірыңғай электр желілерінің жүйелік операторы «Дені саудың жаны сау» деген қағиданы ұстанып, өз қызметкерлерінің спортпен айналысуларына барлық жағдайды жасап келеді. Он төрт жылдан бері үзбей ұйымдастырылып келе жатқан корпоративтік жарыстар атқарылып жатқан ауқымды жұмыстардың бір сарасы ғана.
Спартакиаданың салтанатты ашылу рәсімінде сөз алған «KEGOC» АҚ Басқарма Төрағасының кеңесшісі Жаңабай Бексары спорт мерекесінің негізгі көздегені – компанияның барлық кәсіпорындарының үздік қызметкерлерінің басын біріктіріп, ортақ мақсаттарды жүзеге асыруға жұмылдыру, талант иелерін жан-жақты ынталандыру екендігін атап өтті.
– Спорт жүрген жерде тәртіп те болады. Бұған біз осындай тамаша шаралардың нәтижесінде көз жеткізіп отырмыз. Өткен жылы спартакиада Қарағандыда өтіп, Алматы торабы жеңіске жетті. Биылғы жарыс одан да тартысты, әрі қызықты өтетіндігіне сенімдімін. Барлықтарыңызға сәттілік, шын мықтыға жеңіс тілеймін, – деді ол.
Алғашқы күні арулардың білек күресі мен ерлер футболы жанкүйерлердің ерекше қызығушылығын тудырды. Бірақ та көшбасшылар шешуші кезеңде ғана белгілі болды.
Сонымен, жалпыкомандалық есепте үшінші орынды «Шығыс ЖЭТ» филиалының командасы иеленді. Екінші орынға «Солтүстіктің» спортшылары жайғасса, бірінші орынды спорттың барлық түрлерінде үздіктер қатарынан көрінген жерлестеріміз – «Сарыбай ЖЭТ» филиалының ұжымы иеленді. Барлық жүлдегерлер алғыс хаттармен және бағалы сыйлықтармен марапатталды.
Қуаныш ЕСҚАБЫЛ
