Әр оқушы – дарын иесі
Ақылы кемел, зерек балалар – мемлекеттің ең үлкен байлығы. ХХІ ғасыр – білім мен ғылым, ақпарат пен технологияның ғасыры. Соған төтеп беретін, өзге елдерге өзіңді сыйлататын, өз құдіретіңді мойындататын рух пен алапат күш-жігер қажет. Елбасының қазақстандық білім беру жүйесіне қойып отырған талап-тілегі де – осы сапалы әрі өркениетті білім. Президент жыл сайынғы Жолдауларында білім беру мәселесіне ерекше көңіл бөліп, "Сапалы білім беру – Қазақстанның индустриялық инновациялық дамуының негізі" екендігін үнемі айтып келеді. Шығармашыл, ұшқыр ойлы және ең бастысы, өз білімін іске асыратын тұлға – дарынды балалар. Дарынды балалар еліміздің интеллектуалдық элитасын қалыптастыратын ұлттық құндылық болып саналады, осыған орай көп қырлы құрылымды білім – тәрбие мазмұнын анықтап құруға көмектесетін қазіргі заманғы дамыта оқыту идеясы алынады. "Адам ұрпағымен мың жасайды"– дегендей, ұрпақ тәрбиесі – қай кезеңде де халықтық мәселе болған.Тарихтан білетініміз:дарындылар,қабілеттілер аса жоғары бағаланған. Н.Ожеговтың сөздігінде дарындылық "табиғаттан берілетін ерекше қабілет "деп түсінді-ріледі. Адами ойлау, ізденімпаздық – табиғаттың адамзатқа берген тамаша сыйы. Бұл қабілет барлық адам бойынан табылары сөзсіз. Дегенмен, табиғат оны бәріне бірдей етіп бөлмей, біреуге көптеу, біреуге аздау, ал үшіншілеріне мүлдем жарытпай тарататыны да анық.
Дегенмен, сол оқушыларды мектеп табылдырығын аттағаннан үнемі қадағалап, анықтап, дамыта түсу әр мұғалімнің міндеті деп ойлаймын.
Қостанай қаласындағы №9 орта мектебінде өзім жетекшілік еткен 4 " Ә " сынып оқушылары "Зерде" ғылыми-зерттеу орталығы және қалалық "Дарын" орталығы, ұйымдастырған және халықаралық сан-салалы байқаулардың жүлдегерлері. Сол жеңімпаз оқушыларды атап өтсем – Қоғандасова Әсел "Зерде" ғылыми-зерттеу жұмысы 3 орын, "ЭМУ" эрудиттен Жанабилев Батырхан 1 орын, Шаяхметова Наргиз 1, 2 орындар алса, халықаралық олимпиададан Мадияр 1 орын, Жамбулбеков Асанәлі, Қожамратова Назира 2 орын, Зайтов Мақсат, Мырзабек Арман 3 орын алды. Білім мен өнерді бірдей игерген Назираның би байқауында да, бағы жанып, үнемі 1, 2 орын жүлдегері болды. Бос уақытында кітап оқып, ағылшын үйірмесі мен қалалық би үйірмесіне барады. Жоғарыда аталған оқушыларым мектепішілік, республикалық, халықаралық сайыстарға үнемі қатысып отырады. Оқушыларым осындай дарындылығы, шығармашылығы арқасында облыс,қала оқушыларының қатысуымен, жылда ұйымдастырылатын бәйгелерден оза шауып, облыстық Ы.Алтынсарин атындағы "Дарынды балаларға арналған" мектепке сынақ тапсырып, өз білімдерін сол мектепте жалғастыруға мүмкіндік алып отыр. Осындай оқушыларым барын мақтан етемін, әрине бұл біздің ата-аналармен бірлесіп жасаған еңбегіміздің нәтижесі деп ойлаймын. Сондықтан әр ата-ана әрдайым мектепте берілген біліммен шектелмей, осы оқушылардың ата-аналары сияқты балаларын әрдайым қолдап, жан-жақты білім алуларына жағдай жасап отырса, мұғаліммен қоян-қолтық жұмыс жасаса, әр оқушы – бір-бір дарын иесі бола алатынына кәміл сенемін.
Э.ҚоЙшыбаева,
№ 9 орта мектебінің бастауыш сынып мұғалімі.
Қостанай қаласы.
