Қостанайда автожарыс басталды

Бүгін Қостанайда мүмкіндігі шектеулі жандардың «Кедергісіз келешек» халықаралық автожарысы басталды.

Автожарыс қатысушыларының арасында Ақтөбе, Екібастұз, Қостанай қалалары мен көршілес Ресей елінің азаматтары бар. Тірек-қозғалыс жүйесінің қызметі бұзылған 25 мүгедек арнайы қолмен басқарылатын жеңіл көлікке мініп, Қазақстан мен Ресей қалаларын жүріп өтеді. Олар тамыз айының 25-30 аралығында Қорған, Түмен, Екатеринбург, Челябі, Троицк, Қостанай қалаларында болады. Аталмыш шара «Үміт-Надежда» ҚБ бастамасымен «Нұр Отан» партиясы ҚОФ және Қостанай қаласы әкімдігінің қолдауымен ұйымдастырылды.

-«Нұр Отан» партиясы мүмкіндігі шектеулі азаматтарға қамқорлық көрсету үшін «Кедергісіз келешек» жобасын қолға алған болатын. Автожарыстың өтуіне партиялықтардың жобасы себепкер. Бұл шара бірнеше жылдан бері Қазақстанның ішінде ұйымдастырылатын. Биылдан бастап халықаралық деңгейге жетіп отыр,-деген Қостанай қаласының әкімі А.Ахметжанов қатысушыларға сәт-сапар тіледі.

Шаһар тұрғындары жоба қатысушыларын Қостанай қаласы әкімдігінің алдында салтанатты түрде шығарып салды. Автожарыс 30 тамыз-ҚР Конституция күні аяқталады деп жоспарланған.

 

Қымбат Досжанова

Суретті түсірген Бағдат Ахметбеков