Күйдіру пеші іске қосылды

Көптен күткен Рудный цемент зауытында айналмалы күйдіру пеші тестілік режимде іске қосылды. Қазіргі таңда Қостанай облысының Индустрияландыру картасында енген кәсіпорында технологиялық процестер мен жабдықтар соңғы сынаудан өткізіліп жатыр.

 

Ұзындығы 52 метр, диаметрі 3,5 метрді құрайтын күйдіру пешінің өнімділігі тәулігіне 1500 тонна клинкер шығаруға қауқарлы. Пеш арқылы өткен шикізат 500-ден 1450 градусқа дейін қызып, қоймалжың күйге ауысады. Одан әрі кесектік фракциясы арқылы шикізаттық ұнтақ цементтің негізі саналатын клинкерге айналады.

– Күйдіру технологиясына арнайы жабдықтар – бессатылы кальцинатор мен декарбонизаторды пайдаланудың арқасында пештің жобалық ұзындығы 160 метрден 52 метрге дейін қысқарды. Бұл бізге энергия шығынын екі есеге азайтып, шикізатты дайындауда шығарылған газдардың энергиясын пайдалануға мүмкіндік береді, – дейді Рудный цемент зауытының директоры Артем Макласов.

 

Айта кетейік, бүгінде кәсіпорында 130 адам жұмыс істейді. Зауыт толық іске қосылғанда жұмыскерлер саны 300-ге жетеді деп жоспарланып отыр.

 

Қуаныш ЕСҚАБЫЛ