Салауаттылық сәннен түспейді (ФОТОРЕПОРТАЖ)

А.Байтұрсынов атындағы ҚМУ алаңында бүкіләлемдік денсаулық  күніне орай көңілді де пайдалы іс-шара өтті. Оған мектеп оқушылары мен колледж  студенттері, сондай-ақ қала тұрғындары қатысты.

 

Жүзден астам адам концерт тамашалап, музыкалық жаттығу жасап, би билеп, түрлі жарыстарға қатысты. Егделер жағы скандинавиялық жүру шеруіне шықса, жастар жүгірістен, қол күрес, гір көтеру, асық ату сынды спорт түрлерінен бәсекеге түсті.

Облыс орталығындағы емханалар арнайы құрылған шатырлар астында кез келген тілек білдірушілер медициналық көмек көрсетті: әлдекім қан қысымын өлшесе, бірі қан құрамындағы глюкоза мөлшерін тексерді, енді біреулері салмақтары мен бойларын өлшеді, мамандардан кеңес алды. 

Адамдардың көп шоғыры спорт сайыстары өтіп жатқан маңайларға жиылды. Жеңімпаздар кубоктармен, мадақтамалармен марапатталды. Шараның шарықтау шегінде барлық қатысушыларға тегін витаминдер мен гематогендер үлестірілді. Ұйымдастырушылар – облыстық салауатты өмір салтын сақтау мәселелері жөніндегі орталық, облыстық білім басқармасы, қалалық мәдениет және спорт бөлімдері.

Айта кетейік, бұл мереке өз бастауын сонау 1950 жылдан алады. 7 сәуір 1948 жылы бүкіләлемдік денсаулық сақтау ұйымының (БДСҰ) құрылған күніне байланысты таңдалған. Бүгінгі таңда БДСҰ-ға әлемнің 200-ге жуық елі мүше. Барлығы да дәл осы күні ортақ мерекені атап өтеді.

 

Суреттерді түсірген Бердіболат Көркембаев