Адасқандар табылды
Әулиекөл ауданының құтқарушылары далада адасып кеткен екі тұрғынды тауып алды, деп хабарлайды облыстық ТЖД баспасөз қызметіне сілтеме жасап.
Аудандық ТЖ бөліміне 4 наурыз күні сағат 22:00 шамасында Көктал ауылының екі тұрғынының адасып кеткені туралы хабарлама келіп түскен. Белгілі болғандай, 46 жастағы ер адаммен 47 жастағы әйел жаяу Қараменді ауылына қарай бағыт алған.
![20180305211703](https://old.kostanaytany.kz/wp-content/uploads/2018/03/20180305211703.jpg)
«Адасып кеткен тұрғындарды іздеуге ТЖ бөлімінің екі қызметкері «Нива» көлігімен шықты. Іздеу шаралары барысында құтқарушылар үнемі байланысқа шығып тұрды. Олар адасқандардың назарын аудару үшін «Әулиекөл-Жалдама» тасжолынан 5 шақырым жердегі шөп үймелесін өртеді. Осылайша, жоғалып кеткен тұрғындар алыстан көрінген жарыққа қарай жүрген», – делінген облыстық ТЖД баспасөз қызметі хабарламасында.
Құтқарушылар сағат 02:40-та ер адамды тауып алған. Мұнан соң сағат 03:00-де үсіп кеткен әйел құтқарылды.