Озғанға қарап, бой түзе
Ақпанның тоғызында Оңтүстік Кореяның Пхенчхан қаласында XXIII қысқы Олимпиада ойындары басталған еді. Дүбірлі додада Қазақстан құрама командасы спорттың тоғыз түрі бойынша бақ сынап жатыр. Отандық спортшыларды қолдау мақсатында Қостанайдағы Спорт сарайында жаппай конькимен сырғанау акциясы өтті.
Облыстық Достық үйі ұйымдастырған қайырымдылық іс-шарасына жағдайы төмен отбасылардың балалары мен ата-ана қамқорлығынан тыс қалған жасөспірімдер қатысты. Қаладағы №3 спорт мектебінің спортшылары балалаларға шорт-трек, хоккей, конькимен сырғанаудың әдіс-тәсілдерін үйретіп, өз тәжірибелерімен бөлісті. Спорт сарайына жиналғандар екі сағат бойы сырғанап, концерттік бағдарламаны тамашалады. Қайырымдылық шарасының салтанатты ашылуында ҚР еңбек сіңірген жаттықтырушысы Петр Пастушенко, қазақстан халқы облыстық Ассамблеясы хатшылығының меңгерушісі Мәжит Шүленов сөз сөйлеп, қазақстандық олимпиадашыларға жеңіс тіледі. 
Қысқы Олимпиадаға Қостанай облысынан үш спортшы жолдама алған болатын. Олар: конькимен сырғанаушы Денис Кузин, шорт-трекші Анастасия Крестова және шаңғышы Виталий Пухкало. Өкінішке қарай, шаңғы жарысынан бақ сынаған қостанайлық Виталий Пухкало мәре сызығына 1:19:46,7 уақытта жетіп, 34-орыннан көрінді. Шорт-тректен 500 метрлік жарыста сайысқа түскен Анастасия Крестованың да жолы болмады. Ендігі үмітіміз конькимен сырғанаушы Денис Кузинде. Әзірге, ел қоржынында бір медаль бар. 11 ақпанда әйелдер арасындағы фристайлдан сынға түскен отандасымыз Юлия Галышева қола медальға ие болған еді.
Қымбат ДОСЖАНОВА
Суретті түсірген Бағдат АХМЕТБЕКОВ
