Көрме әсерімен бөлісті

Қостанайлық 15 студент «ЭКСПО-2017» халықаралық мамандандырылған көрмесін тамашалап қайтты. Экскурсия барысында олар Астана қаласының көрікті жерлерін аралады. Елорда сапарындағы әсерлерімен бөліскен Қостанай қызмет көрсету колледжінің студенттерінің қуанышында шек жоқ. 

– Бізге осындай жоғарғы деңгейдегі танымдық сапарды ұйымдастырған басшылыққа рахмет айтамыз. Астананың ең көрікті деген жерлерін автобуспен жүріп араладық. «ЭКСПО-2017» көрмесінде түрлі мемлекеттердің павильондарында болып, әр мемлекеттің жаңашылдықтарымен жеке таныстық. Олардың көрмеге деген дайындығы жоғары деңгейде. Болашақ энергиясы механизмдерін көрдік. Олар суға,күн көзіне, желге және қуат күшіне арналған. Бізге ұнағаны – «Нұр Әлем» сферасы. Алған әсеріміз керемет, – дейді колледж студенттері  Камила Жұмағұлова мен Самина Башеева.

 

Айтпақшы, бұл жобаның жетекшісі – Қостанай облысы білім басқармасы. Қостанай қызмет көрсету колледжі директорының тәрбие жұмысы жөніндегі орынбасары Әлия Әбікенованың айтуынша, көрмеге оқу орнының озаттары аттанды. Олардың ас-суын «Добрый пекарь» ЖШС қаржыландырды. Сондай-ақ, «Best.kz» фирмасымен де байланыс жасалған.

 

Қасқырбай ҚОЙШЫМАНОВ

Суретті түсірген Бағдат Ахметбеков