Партиялықтар Қарасу тұрғындарына көмектесті

«Нұр Отан» партиясы Қостанай облыстық филиалының белсенділері облыс әкімінің тапсырмасымен Қарасу ауданының қызыл судан зардап шеккен тұрғындарына гуманитарлық көмек көрсетті. Партиялықтар Қарамырза ауылына 4.5 мың тонна азық-түлік апарды.

Қарамырза ауылы  аудан бойынша қар суынан ең көп зардап шеккен елді-мекен. Мұнда 860 тұрғын бар. Соның басым көпшілігі қызыл судың зардабын тартты. Алаңсыз жатқан алақандай ауыл қызыл судың екпіні қатты боларын қайдан білсін. Апат айтып келмейді емес пе. Жергілікті билік дер кезінде қимылдап, жағдайды бақылауда ұстады. Үйлеріне су кірген отбасыларды қауіпсіз жерлерге көшірді. Мысалға, сол күні 65 адамды мектепке, 63 адамды балабақшаға орналастырған. Қалғандары туыс-туғандарын паналап отыр. Эвакуациялау жұмыстарына төрт трактор, үш К-700 және басқа да жеңіл көліктер жұмылдырылған. Жапа шеккен тұрғындарды үйлеріне кіргізіп, қайырымдылық жасауға өздері тілек білдірген жандар да табылды.

-15 сәуірде кешке қарай ауылға су кіре бастады. Сол күні ауылдық әкімдіктің мамандары халыққа жағдайды хабарлай бастады. Кез келген оқиғаға дайын болып, дүние-мүліктерін қауіпсіз жерге көшіруді тапсырды. Түнгі сағат үш жарымда адамдарды эвакуациялау басталды. 18 сәуірде түстен кейін су тасқыны сейілді.
Қарамырза өзеніне жақын орналасқан Набережный, Қазақ көшелерінің үйлері қар суының астында қалды. Мектеп пен балабақшаға орналасқан адамдарға үш мезгіл тамақ берілді. Балалар аш қалған жоқ,-деді Қарамырза ауылының әкімі Марина Ағайдарова.Қарасу халқына көмек қолын созған белсенділерді облыстық филиал төрағасының бірінші орынбасары Ғазиз Бекмұхамедов өзі бастап барды. Ауыл адамдарымен кездесіп, хал-жағдайларын сұрады. Су басқан үйлерді аралап, жағдайды өз көзімен көрді.
-Облыс әкімінің тапсырмасымен ауыл тұрғындарына гуманитарлық көмек көрсетуге келдік. Партия белсенділері 4,5 мың тоннадан астам азық-түлік, гигиеналық заттар, балалар тағамдарын әкелді. Азық-түлік тауарлары көмекке мұқтаж жандарға таратылады,-деді «Нұр Отан» партиясы Қостанай облыстық филиалы төрағасының бірінші орынбасары Ғазиз Бекмұхамедов.Шынар БЕККУЛИНА,
Қарамырза ауылының тұрғыны, көп балалы ана:
-Азық-түлікпен қамтып көмек беріп жатқан облыс әкіміне, «Нұр Отан» партиясы Қостанай облыстық филиалының ұжымына, аудандық білім бөліміне рахмет айтамын.  Бірнеше күннің ішінде азық-түліктен таршылық көрген жоқпыз. Басшылық қызыл судан зардап шеккендерді ет, жеміс-жидекпен қамтыды.

 

Қымбат Досжанова.
Суреттерді түсірген Айбек ЖҮЗБАЙ.