Су тасқынына дайын

Көктемгі су тасқанына Қостанай қаласының коммуналшылары да әзір. Жергілікті билік дайындықты тағы бір пысықтап алды. Қалада қауіпті деген төрт аймақ бар. Оның бәрі назарда. Тұрғындарға алаңдауға еш себеп жоқ дейді құтқарушылар."Қостанай Су" мекемесі тасқынға қарсы арнайы жасақ құрған. Бұнда экскаватор, автокран, су сорғыш сияқты техникалар бар. Тіпті, кез келген лай суды ауыз суға айналдыратын "Тазасу-М" техникасының екі данасын әкелген.

-Біз ТЖД-мен тығыз байланыстамыз. Бұл жерде алғашқы әрекетке бекітілген жасақ пен қажетті техникалар бар. Біздің тағы 12 адамнан тұратын қосалқы құрам дайын тұр. Олар да кез келген уақытта көмекке келеді,-дейді "Қостанай Су" МКК-ның бас механигі Алексей Пестрецов.Сондай-ақ, қала билігі "КТЭК" МКК-ның дайындығын да бағалады. Бұнда да бәрі сақдай сай: 30 су сорғыш, 80 инженерлік техника және азық-түлік бар.

Былтырғы қызыл су қаупінен соң биыл қостанайлықтар дайындықты күшейткен. Назарда – 4 аудан. "Қостанай-1" шағын ауданы, Дружба ауылы, Колесная ряды және Тобыл көшесін қарғын су басуы мүмкін.

Суреттерді түсірген Айбек ЖҮЗБАЙ