Қандықол әке
Таран ауданында зайыбын өлтіріп, екі баланы анасыз қалдырған азамат әкелік құқығынан айырылды.
Қанды оқиға 2011 жылы болған. Тарандық азамат мас күйінде өз әйелінің денесіне аса ауыр жарақат салған. Салдарынан шиеттей екі бала анасыз қалды. Сот қылмыскерді бес жылға бас бостандығынан айырған еді. Сондай-ақ, дәрігер-психологтың бақылауына алынған. Бұған қоса, оған алкоголь тұтыну кесірінен туындайтын психикалық және мінез-құлықтық ауытқудан емделу тағайындалды.
Ал аналарынан көз жазып қалған кезде екі баланың үлкені үште, екіншісі бір жаста еді. Қазір олар әжелерінің қамқорлығында. Сот шешімімен қандықол қылмыскер әкелік құқығынан айырылды. Сондай-ақ, одан балаларды бағып-қағуға алимент өндіріледі.
Айта кетейік, жыл басынан бері үш ай ішінде 32 кәмелетке толмаған балаға қатысты 17 азаматты ата-ана құқығынан айыру туралы 16 шешім шығарылған.
