Қазақ группасында орысша оқимын

Мен – Қостанай индустриалды колледжінің студентімін. Әлі оқып жатқандықтан, есімім жасырын қалсын. Бұл колледжде бір ғана мамандықты мемлекеттік тілде алып шығуға болады. «Мемлекеттік тілде» деген аты ғана. Айтайын деп отырғаным – осының айналасы…

Әуелі арман қуып келіп, кейін тағдыр айдап осы колледжге түсіп кеттік. Менде аса таңдау болған жоқ. ҰБТ-ға қатысқан жоқпын. Бұйыртса, болашақ инженер-механикпін (немесе мектепте «Еңбек» пәнінен сабақ бере алады екем). Жалғыз ғана қазақ тілінде оқытылатын мамандық  дегесін… Өзім облыстың оңтүстік аудандарынан боламын. Білсеңдер, ол жақта орысшаны қазақтар тұрмақ орыстардың өзі сөйлемейді. «Хлеб дай»-дан басқа дымды білмейтін мен байғұс оңбай алданыппын қабылдау комиссиясындағыларға. Бүкіл сабақ, күллі лекция орыс тілінде. Куратордан басқасымен қазақша сөйлесу мүмкін емес. Түкті түсінбейтінің былай тұрсын, дәрісшінің «диктоват» етіп жатқанын үлгеріп жазу да бір қиямет. Содан келіп… түсінбегендіктен сабақ айта алмайсың, өмірі сабақ айтпаған соң баға қоймайды. Өйтіп-бүйтіп, оқытушылармен басқаша келісіп, сүйретіліп келемін. Дәптеріңнен бір тұлғасы түзу сөзді көрмеген соң, толық емес, шылқи қате жазылған дәрістерді көргеннен кейін тағы екі аласың. Осылайша, ауылдық жеңілдікпен әрең дегенде грандқа іліккен мен бейбақ стипендиядан бірінші сессиядан соң айырылдым.  Қайтарып алуға жасаған талпыныстарым сол қалпы нәтиже бермей-ақ қойды. Екі жылды артқа тастадым. Қазір шүкір. Керемет сөйлей алмасам да, шамалы орысшаңды түсінетін жағдайға жеттім. Есімде, ең алғаш жатақханаға орналасқалы келіп тұрғанымда, вахташының «Какой курс?» дегеніне «Тургайц» деп жауап бергенім бар. Қазір ойласам, күлкім де келеді))). Жоқ, мүмкін орысшаны «қақпай» келген маған бұнда адасып түскенім жөн болған шығар… Әлдекімді кіналаудан аулақпын. Маған дейін осылай болып келген, менен кейін де солай кететіні анық қой.  …Айтайын дегенім, негізі мектепте жақсы оқу керек екен. Сонда мамандық сені емес, сен мамандықты таңдайсың!

 

Есімсіз Тегіжоқов