Манапбек тағы мойындатты

Ресейдің Екатеринбург қаласында өткен  «Берега Надежды» 49-шы халықаралық фестиваль-байқауынан  жерлестеріміз жүлделі оралды. Ересектер мен кәсіби шығармашылық ұжымдар арасында өткен сында  Е.Өмірзақов атындағы облыстық филармонияның әншісі Манапбек Кәдіров жүлделі 1-ші орынды жеңіп алды.

Халықаралық өнер фестиваліне ТМД және алыс шетелдерден жүздеген  әншілер қатысқанын ескерсек, музыка додасының оңайға соқпағанын бағамдауға болады.

Манапбек ресейлік әділқазылардың алдында Ахмет Байтұрсынұлының «Аққұм» әні мен Балуан Шолақтың «Ғалия» әнін шырқап, тыңдармандарды аса тәнті етті. Сөйтіп, қазақтың өнерін бүкіл дүниежүзіне паш етті.

 Айтпақшы, іріктеу турынан сүрінбей өткен әншілер келесі жылы Ялтада өтетін  «Грант Премий 2015-16» финалдық сайысқа қатысады. Біздің облыстан аты аталған байқауға Манапбектен өзге Рамина Сармурзина, Марал Мұхтаров және Алина Герасим тәрізді жасөскін әншілер бақ сынайды. Бұлардың бәрі Манапбек ағалары сияқты Екатеринбург қаласында өткен фестивальде жүлделі бірінші,екінші орындарды еншілеп қайтқан еді.

 

Әлібек ЫБЫРАЙ

Суретте. Әнші-термеші Манапбек Қәдіров

Суретті түсірген Бағдат Ахметбеков