Игі істерге толы «Тайқазан»

Елімізде ақпан айының алтысында Қазақстан халқы Ассамблеясының жылы салтанатты түрде ашық деп жарияланды. Қоғамдық институттың жиырма жылдығына орай жер-жерде түрлі іс-шаралар басталып кетті. Ассамблея жылына астықты аймақтың да қосар үлесі бар. Бұл туралы Қазақстан халқы облыстық Ассамблеясы төрағасының орынбасары-хатшылық меңгерушісі Бағытұр Дәндібаевтың қатысқан дәстүрлі брифингте айтылды.
Ақпан айының төртінші жұлдызында Елорда төрінде «Қазақстан халқы Ассамблеясы: 20 игі іс» жобасы бастау алды. Республикалық эсафетаның символы-Тайқазан. Бірлік пен молшылыққа баланған Тайқазан Қазақстан халқы Ассамблеясының XXII сессиясына дейін еліміздің барлық облыстарын аралайтын болады. Бұл эстафетаны 6 сәуірде ақтөбелік делегация Қостанай облысына табыстайды. Үш күннен соң аталмыш жоба Қызылорда облысында жалғасын таппақ. Сондай-ақ облыстағы он сегіз этномәдени орталықтың қатысуымен қайырымдылық шаралары жалғасын таппақ. Мәселен, тәжік ұлттық орталығы жылдағы дәстүр бойынша «Жанұя» балалар үйі және қарттар үйіне барып, көмек беретін болады.
– Қилы заманда қазақ даласына түрлі этнос өкілдері қоныс аударды. Олар жергілікті тұрғындармен біте қайнасп, бір шаңырақ астына топтасты. Қостанай облысын мекендеген өзге ұлыс өкілдерінің арман-тілегі, мақсат-мүддесі бір. Бүгінде тәуелсіз Қазақстан дүниежүзі елдеріне бірліктің, татулықтың үлгісін көрсетіп отыр. Ата-баба аңсаған азаттығымыз мәңгілік болсын,-деді ҚХА төрағасының орынбасары-хатшылық меңгерушісі Бағытұр Дәндібаев.

Қымбат ДОСЖАНОВА

Суретте: ҚХА төрағасының орынбасары-хатшылық меңгерушісі Б.Дәндібаев