Ақпанның алғашқы күндеріне арналған ауа райы болжамы

Қазақстанда 31 қаңтар мен 2 ақпан күндері ауа температурасы климат нормасынан 2-6 градусқа жоғары болады.  Бұл туралы Tengrinews.kz  "Қазгидромет" РМК  сілтеме жасап хабарлайды. 

Синоптиктердің мәліметінше,  Қазақстанның барлық аумағында антициклонның ықпалынан ауа райы жауын-шашынсыз болады. Оңтүстік пен оңтүстік-шығыста ғана кей жерлерде жауын-шашын, көктайғақ болып, тұман түседі. Батыста түнгі температура 10-15 градус, күндіз 5-10 градус, кей жерлерде 12 градус аяз болады. Солтүстікте түнде – 22-27, кей жерлерде 12-17, күндіз 8-13, кей жерлерде 20 градус аяз болады. Орталық өңірлерде түнде 25-30, кей жерлерде 15-20, күндіз 8-13, кей жерлерде 17-22 градус аяз болады. Шығыста жауын-шашынсыз болады, түнде температура 25-30 градусқа дейін, кей жерлерде 15-20 градусқа, күндіз 15-20, кей жерлерде 10 градусқа дейін төмендейді.

Ал, "Қазгидромет" кәсіпорнының сайтында Атлантика мен Жерорта теңізінен келген жылы ауа массаларымен Қазақстан аумағында көптен күткен жылы күндер орнайтыны айтылған. "Республикада, орталық, шығыс және оңтүстік-шығыс аудандарынан басқа ауа температурасы ақпан айының алғашқы күндері климат нормасынан 2-6 градусқа жоғары болады деп күтіледі. Мұнда бұрынғыдай Сібір антициклоны өз ықпалын сақтайды және температураның айтарлықтай көтерілуі болжанбайды", – делінген.