Сауда-саттық жәрмеңкесі өтті
Бүгін «Нұр Отан» партиясы ҚОФ-ның «Кедергісіз келешек» жобасы аясында «Шығармашылық ауыр дертті де жеңеді» атты сауда-саттық көрмесі өтті. Іс-шараға облысқа қарасты аудан, қалалардағы елуден астам мүмкіндігі шектеулі азамат қатысы.
-Біздің мақсатымыз мүгедек жандардың өнерін көпшілікке паш ету. Себебі олар ауыр дертке шалдықса да пайдалы іспен айналысады. Басқа түскен ауыртпалыққа мойымай тамаша өнер туындыларын жасайды. Бұл дегеніміз тамаша емес пе. Жастар жағы мұндай адамдардың бар екенін және қиындықпен күресу керектігін білсе,-деді «Нұр Отан» партиясы ҚОФ сайлауалды тұғырнамасын қадағалау бөлімінің кеңесшісі Абылайхан Кәкенов.
Жәрмеңкеде мүгедектердің өз қолдарымен жасаған бұйымдар саудаға шығарылды. Оюлы көрпе, ағаштан жасалған бұйымдар және майлы бояумен салынған картиналардың алуан түрі бар. Өзіңізге ұнап жатса, мархабат. Көңіліңіз қалаған бұйымды сатып алыңыз. Саудадан түскен қаржы мүмкіндігі шектеулі азаматтардың өздеріне қалады.
Аталмыш іс-шараны «Нұр Отан» партиясы ҚОФ-ның бастамасымен облыстық кәсіпкерлер палатасы, әлеуметтік бағдарламалар және жұмыспен қамту басқармасы, «Үміт-Надежда» ҚБ, «Мүгедектердің Қостанай қалалық еріктілер қоғамы» ҚБ ұйымдастырды.
Қымбат Досжанова
Суреттерді түсірген Айбек Жүзбай
