Қайсар Әлім – “Қазақстанның еңбек сіңірген қайраткері”
Газетімізде шығармашылық жолын бастап, 22 жыл жемісті еңбек еткен журналист, жазушы Қайсар Әлім Тәуелсіздік күні қарсаңында мемлекеттік және қоғамдық қызметте сіңірген еңбегі, елдің әлеуметтік-экономикалық және мәдени дамуына, халықтар арасындағы достық пен ынтымақтастықты нығайтуға қосқан елеулі үлесі үшін Елбасы Жарлығымен марапатталғандардың санатында "Қазақстанның еңбек сіңірген қайраткері" атағын иеленді.
Бүгінде республикалық "Егемен Қазақстан" газетінде қызмет істейтін Қайсар Әлімнің қаламынан 23 кітап туындап, оқырмандарының ыстық ықыласына бөленді. Бұдан басқа 8 томдық шығармалар жинағы жарық көрген. Ол көптеген марапаттардың иесі – ҚР Президенті сыйлығының лауреаты, ҚР Мәдениет қайраткері, Қазақстанның құрметті журналисі, Қазақстан Журналистика академиясы "Алтын Жұлдыз" сыйлығының және М.Дулатов атындағы сыйлықтың иегері. Сондай-ақ "Ерен еңбегі үшін" медалінің және Біріккен Ұлттар Ұйымының халықаралық "Құрмет белгісі" орденінің иегері, Жанкелдин ауданының Құрметті азаматы.
Әріптесімізді осынау жоғары наградасымен құттықтай отырып, оған зор денсаулық, шығармашылық табыс тілейміз.
