Тәуелсіздік күні Қостанайда жоғары деңгейде аталып өтті

Облыс орталығында Қазақстан Республикасының Тәуелсіздік күніне арналған мерекелік шараның ресми басталуы түскі сағат 12-деп белгіленгенімен, шаһар жұртшылығы «Сити – орталыққа» таңертеңгі сағат 10-нан бастап жинала бастады. Жұртшылықтың көңіл–күйі көтеріңкі. Жиналғандар аз болған жоқ. Онда әртүрлі ұлттың басын біріктірген облыстағы шығармашылық өнер ұжымдарының тәуелсіздікке тарту ретінде ұсынған концерттері өте жоғары дәрежеде өтті.

Қалада Тәуелсіздік мерекесіне арналған іс-шаралар бір апта бұрын басталып кеткен болатын. Білім ордалары мен мәдениет ошақтарында түрлі тарихи-танымдық кештер өтсе, кітапханалар мен мұражайларда көрмелер мен әдеби кештер ұйымдастырылды.
Тәуелсіздік күні шаһарымыздағы бірқатар жерлестерімізді әңгімеге тартқан едік.
Мөлдір Асқарова, оқушы:
– Бүгін бәріміз айтулы мереке Тәуелсіздік күнін атап өттік. Ел егемендігін алған 23  жылдың ішінде қол жеткізген табыстарымыз көпке белгілі. Мемлекетіміз алдағы уақытта да гүлдене берсін.
Азамат Мұқатов, әнші:
– Тәуелсіздік алғаннан бері Президенттің Қазақстанды өркендетуде сіңірген еңбегі зор. Барлық саладағы жетістіктерді оның есімімен тығыз байланыстырамыз. Елбасы Қазақстанның болашағы жастарға үлкен сенім артады.
Зейнеп Жолдасов, зейнеткер:
– Бар болғаны 23 жыл ішінде мемлекетіміздің қол жеткізген табыстары әлемге үлгі боларлықтай. Халқымыздың әлеуметтік-тұрмыстық жағдайы да күн санап жақсарып, экономикамыздың барлық саласы қарқынды дамуда.