Биыл облыста ауыл шаруашылығы саласына 40 млрд теңге бөлінеді
Үстіміздегі жылы Қостанай өңірінің ауылшаруашылығы саласын дамытуда ауқымды міндеттер тұр. Бұл туралы облыс ауыл шаруашылығы саласының өткен жылғы жұмыс қорытындысы мен 2023 жылға арналған жоспарына арналған кеңесте облыстық ауылшаруашылығы басқармасының басшысы Тимур Бейсембаев айтты. Ол соңғы бес жылдың бедерінде салаға құйылған инвестиция көлемі екі есе артқанын тілге тиек етті. Өткен жылдың өзінде 21,8 млрд теңге бағаланған он екі жоба ел игілігіне асқан. Бес жүзден астам жұмыс орны ашылды. Облыс тұрғындарын азық-түлік өнімдерімен қамтасыз ету ісі де бұрнағы жылдарға қарағанда арта түскен. Дегенмен, әлі жеткіліксіз. Көп тауар еліміздің өзге өңірлерінен, Ресей Федерациясы мен Белоруссиядан тасымалданады.
-2022 жылдың қорытындысы бойынша 90,9 мың тонна ет, 420,4 мың тонна сүт және 573,6 млн. дана жұмыртқа өндірілді. Етті бағыттағы мал шаруашылығын дамыту үшін облыста отыз сегіз бордақылау алаңының желісі құрылды . Олар өткен жылы 31,1 мың қара мал сатып алды. Мәселен, "Терра" ЖШС былтыр 21,3 мың ірі қара мал әкелді. Облыста еліміздегі ең ірі "Биф Экспорт Групп" ЖШС ет өңдеу кешені жұмыс істейді. Кәсіпорын 202 жылы 17,5 мың ІҚМ сатып алып, 3,5 мың тонна сиыр етін өндірді. Ішкі нарықта ет өнімдерінің 97% сатылды, 3% – і Өзбекстанға экспортқа жөнелтілді. Биыл енді елу мың қара мал сатып алынбақ. Осылайша, он мың тонна ет өндірілмек, – дейді басқарма басшысы.
Жалпы, азық-түлік қауіпсіздігін қамтамасыз ету үшін өңірде 210 өңдеу кәсіпорны жұмыс істейді Оның ішінде тоғыз сүт фермасы, жиырма жеті ет өңдейтін кешен, сегіз өсімдік майы өндірісі, екі былғары және жүн өңдеу, қырық бес диірмен, төрт жарма өндіру цехы бар. 2023 жылы ауыл шаруашылығы саласына 40,3 млрд теңге қаржы бөлінбек. Ол асыл тұқымды мал шаруашылығын дамытуға, майлы дақылдар өндірісін субсидиялауға, мал өнімдерін тереңірек өңдеуге , ауыл шаруашылығы өнімдерін сатып алуға жұмсайтын шығындарға бағытталатын болады. Биыл облыста сегіз сүт-тауар фермасын салу жоспарланып отыр. Жаңа кешендерде жылына алпыс мың тоннаға жуық сүт өндіріледі. Сондай-ақ, сұйық май экстракциялау зауыты мен құрама жем зауытының құрылысы жоспарланған. Мұның бәрі ірі қара мал басын көбейтуге мүмкіндік береді.Биылдан бастап өңірде бірқатар сүт-тауар фермасы ашылады. Сондай-ақ, бүгінде құны жоғары майлы дақылдар алқабы ұлғайтылмақ.
Алқалы басқосуда шаруашылық жетекшілері егін және мал өсіру бағытындағы өз тәжірибелерін ортаға салды. Шаруалар кей мәселе мен оларды шешу жолдары туралы сөз қозғады. Жиын соңында сөз алған облыс әкімі Құмар Ақсақалов халықты қажетті азық-түлікпен қамтасыз ету үшін ауылшаруашылық саласында тың серпін қажеттігін атап өтті.
Әлібек ЫБЫРАЙ
Суреттерді түсірген Бердіболат КӨРКЕМБАЕВ
