Торғайда медресе ашылды
Биыл ҚР Еңбек сіңірген мұғалімі, ағартушы-ұстаз, дін қайраткері Ғазиз Әмірханұлының туғанына 95 жыл толды. Осыған орай Торғай кентінде қайраткер атындағы медресе ашылды.
1992 жылы іргетасы қаланған діни оқыту орталығы заман талабына сай күрделі жөндеуден өткізіліп, «Ғазиз қажы атындағы медресе» атауымен қайта жаңарған ғимараттың лентасы қиылды. Аудан әкімі Шота Оспанов, Қазақстан мұсылмандар діни басқарамасы бас мүфтиінің кеңесшісі Кенжетай қажы, ауданымыздың Құрметті азаматы, ауыл шаруашылығы саласының ардагері Тыныштық Әбжамалов тілектерін білдірді. Ғазиз қажы Әмірхановтың рухына құран бағышталды. Қайта түлеген медреседе шәкірттерге барлық жағдай қарастырылған. Жиырма адамдық жатын бөлмесі төсек орындарымен және арнайы оқу бөлмесі құралдармен қамтылған. Ал, бір бөлмесі ағартушы ұстаздың тұтынған заттарымен толықтырып, мұражайға айналдырған. Саналы ғұмыры өскелең ұрпаққа үлгі бола білген ұстаздың шығармашылық-педагогикалық қызметінің құндылық негіздерін ашу мақсатындағы конференция Астана, Арқалық қаласынан және облыстық білім басқармасының қызметкерлері, Амангелді ауданынан арнайы шақырылған меймандар, дін өкілдері мен шәкірттері қатысты.
Сондай-ақ, қайраткердің ғибратты ғұмыры мен ел үшін еткен ерен еңбегін арқау еткен республикалық конференция өтті. Келелі жиында аудан әкімінің орынбасары Еренбол Алматов құттықтау сөз сөйлеп, Оспан қожа әулие мешітінің бас имамы Рүстем Исламұлына ұлт ұстазы А.Байтұрсынұлының 150 жылдығына арналған естелік төсбелгі табыс етті. Аудандық білім бөлімі әдістемелік кабинетінің меңгерушісі Жанат Темірова «Еңбегі ерен, өмірі өнеге» тақырыбында баяндама жасап, Ғазиз Әмірханұлының атқарған еңбек жолдарына тоқталды. Филология ғылымдарының доценті Ардақ Абдуллина ағартушы-ұстаздың тағылымы төңірегінде әңгіме өрбітті. Торғай мұражайлар кешенінің директоры Гүлбану Сәрсекей тәлімгерінің жасаған жақсылықтары мен елеулі еңбектерін баяндады. Ғазиз қажы Әмірханұлының немересі, Ы.Алтынсарин атындағы жалпы білім беретін мектебінің ағылшын тілі пәні мұғалімі Ақбота Әмірханова «Ұлағаты мол ұстаздар әулеті» жөнінде тебірене сөйлеп, атадан қалған сара жолды үзбей жалғап келе жатқанын тілге тиек етті. Жергілікті ақындардың Ғазиз қажының мерейтойына арнаған жыр шумақтарын мектеп оқушылары мәнерлеп оқып берді. Жанкелдин ауданының Құрметті азаматы, экономика саласының ардагері Жұмақан Садуақасов көпшілікке бата берді. Шоқан қажы Ғазизұлы аймақтық конференцияның жоғары деңгейде өтуіне мұрындық болған ауандық білім бөлімінің ұжымына, алыс-жақыннан келген қонақтарға алғысын білдірді.
Өнегелі өмірінің 45 жылын барлық күш-қуатын білім саласына арнаған ұлағатты ұстаздың есімі ел есінде мәңгілік сақталары сөзсіз. Өлшеусіз еңбегі де елеусіз қалған жоқ. Қазақ ССР оқу министрлігінің «Қазақ ССР халық ағарту ісінің озық қызметкері» төсбелгісімен марапатталған. Тарихи Торғай еліндегі жас ұрпақтың болашағы жарқын болу үшін көз майын тауысып, білім нәрін сепкен ұстаз руханият саласында да тер төкті. Елі ардақтап құрмет тұтты. Ұрпағы ізін жалғап, дін жолында еңбек етіп жүр..
Байбатыр АХМЕТБЕКОВ,
Жанкелдин ауданы
