Әскерилер айлығы 60 пайызға өседі
ҚР Қорғаныс министрінің орынбасары Сұлтан Камалетдинов әскери қызметшілерді әлеуметтік қамсыздандыру мен еңбекақы төлеу жүйесін жақсарту жұмыстарын баяндады, деп хабарлайды ҚазАқпарат тілшісі.
«Мемлекет басшысының тапсырмасымен 2023 жылы ҚР Қарулы Күштері әскери қызметшілерінің лауазымдық жалақысы орта есеппен 60%-ға артады. Сондай-ақ келесі жылы ҚР Қарулы Күштерінің арнайы мақсаттағы бөлімшелеріндегі әскери қызметшілердің лауазымдық жалақысын 20%-ға арттыру жоспарланған», – деді Сұлтан Камалетдинов ОКҚ брифингінде.
Спикердің айтуынша, әскери қызметшілердің әлеуметтік қорғалуын жақсарту жұмыстары да жалғасуда.
«Осыған байланысты Үкімет 2023 жылғы 1 қаңтардан бастап Қарулы Күштер мен Ұлттық ұланның ұшу құрамының лауазымдық жалақысын арттыруды, әскери медицина қызметкерлерінің ақшалай үлесін азаматтық медициналық мекемелердегі медицина қызметкерлерінің жалақысы деңгейіне жеткізуді, жоғары әскери оқу орындары оқытушыларының жалақысын азаматтық ЖОО деңгейіне дейін арттыруды, ТЖ зардаптарын жою кезінде ақшалай қаражаттың Ұлттық ұланмен және ІІМ-мен бірдей 3 еселенген мөлшерін мақұлдады», – деді С. Қамалетдинов.
