Өлеңдіден шыққан шебер отбасы

«Атамекен» ұлттық кәсіпкерлер палатасының бастамасымен жыл бойы өтетін «Бір ауыл – бір өнім» жобасының облыстық көрмесі салтанатты түрде ашылды. Аталған жобаға облысымыздың түкпір-түкпірінен іскер қатысушылар келіп қатысты. Іскер қатысушылардың арасында көзіме түскені – қой жүнінен жасалған ерекше бұйымдар, атап айтқанда, картиналар мен магниттер. Қолөнер туындыларын ұсынған қостанайлық шеберлер Аңқауовтар отбасы.

«Arlan Design» картина галереясы бүгінгі таңда сурет және қолөнер кәсіпорыны ретінде жақсы таныс. Галереяны ағайынды төрт жігіт ашқан еді. Олар Науырзым ауданы Өленді ауылының тумалары. 1997 жылы Аңқауовтар отбасы Қостанай ауданы Майкөл ауылына көшіп келген. Осында өсіп-өніп, 2011 жылы кәсіп ашады. Содан бері шебер ағайындылар өздерінің ізденістерінің, еңбектерінің жемісін көруде. Бертін келе, 2019 жылы Қостанайға көшіп, жеке кәсіптерін ары қарай дамытып, жалғастырып жатыр.

«Бүгінде бұл кәсіппен айналысып жатқанымызға 11 жыл болып қалды. Осы жылдар аралығында көптеген байқауларға қатысып, белестерге де жетіп келеміз. Атап айтатын болсақ, 2005 жылы Біріккен Араб Әмірлігінің Абу‑Даби қаласында еліміздің қолөнерін таныстырдық. Қостанай меценаттар клубының лауреаты атандық. Қазақ хандығының 550 жылдығында алтын медаль берілді. Сонымен қатар, 2015 жылы Ақтөбе қаласында Республикалық байқаудан екінші орын алдық. 2021 жылы Республикалық «Шебер» байқауының «Жаңашылдық» номинациясын иелендік. Сондай‑ақ оқушымыз Жанболсын республикалық «Жасай бер, Тәуелсіз ел» байқауында үшінші орынға ие болды», – деп бізге жетістіктерін тізбектеген Бағлан Аңқауов жұмыстарын таныстырды.

Қазір қолөнерші жігіттер үш бағыт бойынша жұмыс істейді. Біріншіден, балаларды оқытады, үйретеді, оларды еңбексүйгіштікке баулиды, шығармашылық қабілеттерін оятады және саусақтың ұсақ моторикасын шынықтыру арқылы ойлау қабілетін де дамытады.

«Бұл іспен шұғылдану арттерапия әсеріне де ие, емдік қасиеті бар. Балалар ұялы телефондардан бәр сәт арылып, қолөнер саласына назарын аударып, қызыға бастайды», – дейді шебер.

Екінші бағыт – кәдесыйлар жасау. Картиналармен қатар, қой жүнінен магниттер, тері бұйымдарын тігіп, кілем тоқиды.

«Осы тұста айта кетсек, біздің қатарымызға анамыз да қосылып, 5 жыл қатарынан кілем тоқумен айналысып, өз жұмыстарын байқауларға ұсынып жүр. Осы кәсіпті ілгерілетуде анамыз бірніші күннен бастап бізді қолдап келеді. Әр картинамызға қаптама тігіп береді. Алғашқы тұсаукесерді ұйымдастырғанда және өткізгенде басы-қасында болды», – деп әңгімелесушіміз отбасылық кәсіптің басты қолдаушысын да ұмыт қалдырмады.

Үшінші бағыт – картина галереясы, әртүрлі картиналар жасаумен айналысады. Алдағы мақсаты – картиналарды еліміздің басқа өңірлеріне таратып, әлемге танымал брендке айналдыру.

Ауылдан шығып, қиындыққа мойымай, үлкен істі қолға алған осындай азаматтар баршаға үлгі болуға тиіс.

Айдана МАНАТ