400 шақырым жүріп өтеді
Ахмет Байтұрсынұлының 150 жылдығына орай «Қостанай велоқауымдастығы» ҚБ 14-16 шілде аралығында Қостанай-Әулиекөл-Шолақсай-Қостанай бағыты бойынша жалпы ұзындығы 400 шақырымдық велошеру өткізеді. Оған қатысуға 20-дан астам велошабандоз ниет білдіріп отыр. Оның ішінде 60 жастан асқан ардагерлер де бар.
Велошеру 14 шілде күні сағат 10.00-де Қостанайдағы А.Байтұрсынұлы ескерткіші маңынан бастау алады.
Шолақсай ауылында жергілікті кәсіпкер, облыстық мәслихаттың депутаты Мәди Ихтиляповтың қолдауымен ҚӨУ психология кафедрасының оқытушылары 9-10-11 сынып оқушыларына кәсіптік бағыт-бағдар беру және тұлғалық өсу жөнінде тренингтер өткізеді. Сондай-ақ велоқауымдастық мүшелері ауыл тұрғындарымен асық, шахмат ойнайды. Іс-шараның соңы велошеруге қатысушыларды марапаттау және жарыс жеңімпаздары мен тренингке белсенді қатысушыларды марапаттау болады.
