Күмбірле, қоңыр домбыра!

Шілденің алғашқы жексенбісі – Ұлттық домбыра күні. Бұл қазақтың қасиетті қара домбырасын үкілеп, төрге ілген әр қазақ үшін ұлық мереке. Мереке біздің өңірімізде өз деңгейінде аталып өтуде.

Мәселен, "Жұлдыз" домбыра студиясының домбырашылары Батыс Қазақстан облысына челлендж жолдады. Өнерлі жастар домбыраның пішінін келтіре отырып, "Балбырауынды" күмбірлетті. Ахаң атындағы Қостанай өңірлік университеті және облыстық көркемөнерпаздардың халық шығармашылығы мен кинобейнеқор орталығы ұйымдастырған шарада жас домбырашылар бар өнерін салды.

Жастар сарайында "Күмбірле, қоңыр домбыра!" атты облыстық күйшілер байқауы ұйымдастырылды. Оған ұлттық өнерді ұлықтап, аудан, қалалардан барлығы 9 өнерпаз қатысты. Байқау шарты бойынша әр қатысушы үш шығарма орындауға тиісті. Соның ішіндегі биылғы жаңашылдық – Тобыл-Торғай өңірі композиторларының бір күйін орындау. Одан әрісі кез келген автордың төкпе және шертпе күйін орындап шығу.

"Аталмыш байқау дәстүрлі түрде өтіп келеді. Облысымыздың түкпір-түкпірінен жас өнерпаздар бас қосып, бір-бірімен тәжірибе алмасады, бар шеберліктерін көрсетеді. Биыл үміткерлер шертпе және төкпе күйдің сыртында жергілікті сазгерлеріміздің күйлерін де орындамақ. Мұндағы мақсатымыз – Тобыл-Торғай өңірінде шыққан күйлерді жаңғырту. Осы байқауда оза шапқан жеңімпаздар алдағы уақытта жоғары деңгейлі байқауларда біздің өңірді танытатын болады", – дейді облыстық көркемөнерпаздардың халық шығармашылығы мен кинобейнеқор орталығының басшысы Дәмер Қалқаев.

"Байқауға өңірімізден жақсы-жақсы домбырашылардың келгені қуантты. Сонымен қатар, жергілікті сазгерлердің шығармаларын орындау талабының қосылғаны құптарлық. Оның ішінде Ахмет атамыздың, Аманкелді өңірінің тумасы Айтбай Мұздаханов ағамыздың бірнеше күйлері орындалды. Жастардың осындай туындыларды жай орындап қана қоймай, түсініп отырғаны қуантады. Келешекте осы күйлерді насихаттайтын да жастарымыз. Жалпы байқаудың деңгейі жылдан-жылға артып келеді. Бір емес бірнеше рет қатысып жатқан жастар бар. Бәрі де лайықты бағасын алды", – дейді Е.Өмірзақов атындағы облыстық филармониясының қазақ ұлт аспаптар оркестрінің бас концертмейстері, қазылар алқасының төрағасы Мұрат Хамитов.

Жастар сарайының концерт залында Ұлттық домбыра күніне арналған облыстық "Ғасырлар пернесі" атты қазақ ұлт аспаптары ансамбльдерінің фестивалі де өтті. Әттеген-айы – тамаша кешке халық аз жиналды.

Өнер кешіне облысымыздағы аудан, қалалардан үздік деген ұжымдар келді. Олар алдағы уақытта республикалық деңгейде өтетін байқаулар мен фестивальдерде өнер көрсететін болады.

Сонымен бір күнде екі мәдени шара өтіп, фестиваль соңы марапатқа ұласты. "Күмбірле, қоңыр домбыра!" атты облыстық күйшілер байқауының жеңімпаздары дипломмен және ақшалай сыйлықпен марапатталды.

1 орын — Бекзат Байсалбаев, Рудный қаласы (100 мың теңге).

2 орын — Ділназ Махамбетова, Рудный қаласы (80 мың теңге).

3 орын — Молдабек Абылайхан, Рудный қаласы (60 мың теңге).

Меңдіқаралық Мұқажар Ораз Тобыл-торғай сазгерлерінің күйлерін шебер орындап, Ахмет Байтұрсынұлы атындағы арнайы сыйлықты еншіледі. Ал Науырзым ауданынан келген Аңсаған Нұрғалиев шертпе күйдің шебері атанып, Тәттімбет Қазанғапұлы атындағы арнайы жүлдеге ие болды. Батырбек Байназаров жүлдеге ілікпеген өнерпаздарды Қостанай облысы Күйшілер одағының Алғыс хатымен марапаттады.

"Ғасырлар пернесі" фестивалінде өнер көрсеткен барлық ұжым 150 мың ақшалай сыйлықпен және дипломдармен марапатталды.

Айтолқын АЙҚАДАМОВА
Суреттерді түсірген Бағдат АХМЕТБЕКОВ