Тарихты тұлғалар жасайды
Кеште облыс әкімі Н. Садуақасов, ҚР Ұлттық ғылым академиясының академиктері Кенжеғали Сағадиев, Сағындық Сатыбалдин, Шайсұлтан Шаяхметовтың балалары, туған-туыстары, сонымен бірге құрметті қонақтар, әріптестері, шығармашылық зиялы қауым және мәдениет, білім, өнер өкілдері болды. Еске алу кеші басталмас бұрын сахнада Шайсұлтан Шаяхметовтың балалық шағынан бастап лауазымды қызмет атқарған елеулі еңбек жолынан сыр шертетін әр жылғы фотосуреттерінен бейнекөрініс көрсетіліп тұрды. Бейнекөрініс құлаққа жылы тиетін әдемі саз әуенімен сүйемелденді.
Еске алу кешін аймақ басшысы Н.Садуақасов ашты. Ол өз сөзінде жерлесіміз, ғалым, қоғам қайраткері, елінің абзал да саңлақ ұлы, Тәуелсіз мемлекетіміздің бірінші Білім министрі болған Ш.Шаяхметовтың өмір жолы баршамызға үлгі, Қостанай өңірінен Шайсұлтан ағамыздай аға буын өкілдерінің елімізге, мемлекеті-мізге сіңірген еңбектері жарық жұлдыздай болып тұратындығын, ұрпақтар сабақтастығының соны бір толқын екенін айтып өтті. Одан кейін есімдері елімізге танымал қоғам қайраткерлері Кенжеғали Сағадиев, Сағындық Сатыбалдин, қарт ұстаз Мейрам Мұхамеджанов сөйлеп, Шайсұлтан Шаяхметовтың балалық шағынан, ғылым жолынан, жоғары лауазымды қызметтер жолдарынан, қоғам қайраткері ретіндегі елеулі еңбегінен сыр шертіп әңгімеледі. Қазақ елінің осындай өр тұлғалы, саңлақ ұлы Шайсұлтан Шаяхметовтың тәуелсіз еліміздің бірінші Білім министрі болып тұрғанда сіңірген еңбегі орасан зор. Ал, ол жылдар Кеңес үкіметі ыдыраған, өтпелі ауыр кезеңдер еді. Сол шақта бөлек-бөлек болған білім беру жүйесін қалпына келтіріп, тас түйіндей бір арнаға тоғыстырды. Уақыт ағымын түсініп, көрегендікпен білім беру саласын нарықтың ағымына үйлестірді. Ал, бұл міндеттер екінің бірінің қолынан келмесі анық. Білім саласына көптеген жаңа жобалар, бағдарламалар, соны жаңалықтар енгізді. Қазіргі таңда Шайсұлтан ағамыздың еліміздің білім беру саласына салып кеткен түрен жолы үлкен серпілістер әкелгенін атап өтті.
Еске алу кешінде Қазақстанның танымал әншісі Нұрғали Нүсіпжанов, жергілікті әншілеріміз бен әртістеріміз Шайсұлтанның өлеңіне жазылған әндерді орындады. Және де ол кісінің өмір жолына арналған киноновелладан үзінді көрсетілді. Еске алу кешінің соңында Шайсұлтан Шаяхметовтың ұлы Бейімбет Шаяхметов жиналған қауымға, жергілікті атқару органдарына, қолдау көрсетіп, көмек берген Қостанай өңірінің ағайын-жұртшылығына рахметін айта келіп, әкесінің Қостанай қаласындағы көшеге есімі берілгеніне, мүсіні ашылғанына, осындай еске алу кешінің өткеніне ағайын-туған және бауырларының атынан ризашылығын білдірді.
Гүлназым
САҒИТОВА
Суретте: еске алу кешінен көрініс.
Суретті түсірген
Бағдат АХМЕТБЕКОВ.
